Жорий йилнинг ўтган даври мобайнида Миришкор туманидаги ҳайдовчиларнинг 321 нафари белгиланган тезликка риоя қилмаган бўлса, 68 нафари маст ҳолда машина бошқарган. Бу ҳақда туман Йўл ҳаракати ҳавфсизлиги гуруҳи томонидан ташкил этилган давра суҳбатида маълум қилинди.
Таъкидланишича, жорий йилнинг ўтган даври мобайнида туманда ҳайдовчилар томонидан 6667 та қоидабузарлик қайд этилган бўлиб, қоидабузарликлар эвазига 921 миллион 163 минг сўмлик жарима ундирилган. 87 миллион 450 минг сўмлик жарималарни ундириш учун судга мурожаат қилинган.
— 6667 та қоидабузарликнинг 321 таси белгиланган тезликка риоя қилмаслик бўлса, 74 нафар ҳайдовчининг рулда телефондан фойдалангани аниқланган, — дейди Миришкор туман ИИБ Йўл ҳаракати хавфсизлиги гуруҳи раҳбари, капитан Ойбек Шомуродов. – 79 та ҳолатда эса ҳайдовчилар қизил чироқда ҳаракатланган. 9 нафар ҳайдовчи ҳаётини хавф остига қўйиб қарама-қарши йўналишда машина бошқарган бўлса, 68 нафар ҳайдовчи ўзгалар ҳаётини ҳам хавф остига қўйиб маст ҳолда машина бошқарган.
Тадбирда сўз олган маҳалла раислари айни кунда «Жейнов» чорраҳасидаги светафор бир вақтнинг ўзида 2 хил рангда ёниши-ю ҳайдовчиларнинг маҳаллалар орасидаги йўлаклардан катта тезликда ҳаракатланишидан нолиди. Ва туман Йўл ҳаракати хавфсизлиги гуруҳи инспекторларидан ёрдам сўради.
— Жейнов чорраҳасидаги светафор бир вақтнинг ўзида икки хил рангда ёнади, — дейди тадбир иштирокчиларидан бири. – Анча пайтдан бери шундай носоз ҳолатда ишлаяпти. Ҳеч ким бунга эътибор қаратмаяпти.
Мактаб директорларининг айтишича, таълим муассаслари ёнида ноқонуний «стоянка»лар ҳам пайдо бўла бошлаган.
— Мактабимизнинг чиқиш дарвозаси олдида ноқонуний «стоянка» пайдо бўлган, — дейди 21-мактаб директори. – Ушбу масаланинг ижобий ечим топиши учун туман ИИБ ва Йўл ҳаракати хавфсизлиги ходимларидан ёрдам кутиб қолардим.
Тадбирда таъкидланишича, Миришкорда жорий йилнинг ўтган даври мобайнида 8 та ЙТҲ содир этилган бўлиб, унда 2 нафар фуқаро вафот этган.
Изоҳ (0)