Kanadada yengil samolyot halokatga uchrashi oqibatida 7 kishi qurbon bo‘ldi. Ularning barchasi o‘zbekistonlik

Kanadaning Ontario provinsiyasida yengil samolyotning halokatga uchrashi oqibatida yetti kishi qurbon bo‘ldi.

Asli o‘zbekistonlik, AQShning Texas shtatida istiqomat qiluvchi Otabek Obloqulov Ontarioning Kingston shahri atrofida Piper PA-32 samolyotini boshqarib ketayotganida halokatga uchragan. Samolyot Ontarioning Markxem shahridan Kvebek provinsiyasining Kvebek shahri tomon harakatlanayotgan bo‘lgan.

Samolyotda Obloqulovning turmush o‘rtog‘i va 3, 11 va 15 yoshli farzandlari bo‘lgan. Bundan tashqari, bortda Kanadaning Toronto shahrida doimiy istiqomat qiluvchi, asli O‘zbekistondan bo‘lgan Bobomurod Nabiyev va uning turmush o‘rtog‘i ham bo‘lgan.

Samolyot Kingston shahrining shimoli-g‘arbiga, quyuq o‘rmonga qulagan. Fojia oqibatida samolyotning barcha yo‘lovchilari halok bo‘lgan.

Halokat sabablari o‘rganilmoqda. Kanada meteorologiya xizmati tarqatgan xabarga ko‘ra, samolyot qulagan paytda hududda kuchli shamol esgan.