Joriy yil 25-noyabr kuni profilaktika inspektorlari tomonidan Toshkentdagi Reabilitatsiya markaziga 28 kishi olib kelindi, ertasiga esa yana 24 kishi poytaxt IIBB xodimlari tomonidan qutqarildi. Bu haqda IIBB matbuot xizmati xabar bermoqda.
Kunlar sovib ketdi, bunday haroratda uysiz qolgan inson ko‘chada halok bo‘lishi hech gap emas. Bu kabi holatlarning oldini olish maqsadida Toshkent shahar IIBB profilaktika inspektorlari va ularning hamkasblari shu kunlarda, ayniqsa, tungi vaqtda uysiz qolgan insonlar qo‘nim topishi mumkin bo‘lgan joylarni tekshirib yuradi. Ular odatda chordoq va yerto‘lalarda, tashlandiq qurilish binolarida joylashishadi. Xodimlar topilgan barcha uysizlarni Muayyan yashash joyiga ega bo‘lmagan shaxslarni reabilitatsiya qilish markazi qoshida tashkil etilgan turargohga taklif qiladi.
Kimdir darhol xizmat avtomobiliga o‘tiradi, kimlarnidir esa xodimlar ularga yaxshilikni ravo ko‘rishi va boshpana berishlariga ishontirishga to‘g‘ri keladi. Markazda uysizlar shifokor ko‘rigidan o‘tadi, zarur bo‘lganda ularga tibbiy yordam ko‘rsatiladi, toza kiyim, issiq ovqat beriladi. Ko‘plab uysizlar uchun IIBB xodimining kelishi xursandchilikka aylangan.
“Hurmatli hamshaharlar va poytaxt mehmonlari! Yordam berishga tayyor insonlar bo‘lmasa, uysiz qolgan shaxslar halok bo‘ladi. Ularni birgalikda qutqaraylik! Buning uchun ko‘p ish qilish shart emas: 102 raqamiga qo‘ng‘iroq qilib, uysiz qolgan kishi haqida xabar bering. Iloji boricha uning qayerdaligini aniqroq ma’lum qiling. Markazda joylashgan kishilar ustki va oyoq kiyimlarga, gigiyena vositalariga muhtoj. Fuqarolarimiz yordamidan xursand bo‘lamiz. Yordam qo‘lini cho‘zmoqchi bo‘lganlarning barchasi Muayyan yashash joyiga ega bo‘lmagan shaxslarni reabilitatsiya qilish markaziga kelishlari mumkin”, — deyiladi xabarda.
Izoh (0)