Жорий йил 25 ноябрь куни профилактика инспекторлари томонидан Тошкентдаги Реабилитация марказига 28 киши олиб келинди, эртасига эса яна 24 киши пойтахт ИИББ ходимлари томонидан қутқарилди. Бу ҳақда ИИББ матбуот хизмати хабар бермоқда.
Кунлар совиб кетди, бундай ҳароратда уйсиз қолган инсон кўчада ҳалок бўлиши ҳеч гап эмас. Бу каби ҳолатларнинг олдини олиш мақсадида Тошкент шаҳар ИИББ профилактика инспекторлари ва уларнинг ҳамкасблари шу кунларда, айниқса, тунги вақтда уйсиз қолган инсонлар қўним топиши мумкин бўлган жойларни текшириб юради. Улар одатда чордоқ ва ертўлаларда, ташландиқ қурилиш биноларида жойлашишади. Ходимлар топилган барча уйсизларни Муайян яшаш жойига эга бўлмаган шахсларни реабилитация қилиш маркази қошида ташкил этилган тураргоҳга таклиф қилади.
Кимдир дарҳол хизмат автомобилига ўтиради, кимларнидир эса ходимлар уларга яхшиликни раво кўриши ва бошпана беришларига ишонтиришга тўғри келади. Марказда уйсизлар шифокор кўригидан ўтади, зарур бўлганда уларга тиббий ёрдам кўрсатилади, тоза кийим, иссиқ овқат берилади. Кўплаб уйсизлар учун ИИББ ходимининг келиши хурсандчиликка айланган.
«Ҳурматли ҳамшаҳарлар ва пойтахт меҳмонлари! Ёрдам беришга тайёр инсонлар бўлмаса, уйсиз қолган шахслар ҳалок бўлади. Уларни биргаликда қутқарайлик! Бунинг учун кўп иш қилиш шарт эмас: 102 рақамига қўнғироқ қилиб, уйсиз қолган киши ҳақида хабар беринг. Иложи борича унинг қаердалигини аниқроқ маълум қилинг. Марказда жойлашган кишилар устки ва оёқ кийимларга, гигиена воситаларига муҳтож. Фуқароларимиз ёрдамидан хурсанд бўламиз. Ёрдам қўлини чўзмоқчи бўлганларнинг барчаси Муайян яшаш жойига эга бўлмаган шахсларни реабилитация қилиш марказига келишлари мумкин», — дейилади хабарда.
Изоҳ (0)