Samarqand shahridagi 42-maktabda tarix fanidan dars bergan o‘qituvchi Izzatillo M.ni 15 kishi kaltaklagani hamda o‘qituvchi olgan tan jarohatlari natijasida hayotdan ko‘z yumgani haqida xabar berilgan edi. O‘zbekiston Ichki ishlar vazirligi huzuridagi Tergov departamenti mazkur holat bo‘yicha rasmiy ma’lumot berdi.
Ichki ishlar vazirligi xabaridan anglanishicha, samarqandlik o‘qituvchi 15 kishi emas, balki to‘qqiz kishi tomonidan kaltaklangan.
Ma’lum qilinishicha, 2019-yil 20-noyabr kuni taxminan soat 02:00 da 28 yoshli fuqaro Izzatillo M. o‘zining 30 yoshli tanishi Maqsud bilan birgalikda Samarqand shahar Buyuk ipak yo‘li ko‘chasida joylashgan avtobus bekati oldidan o‘tib ketayotgan Asal ismli ayolga gap otgan. Bu vaqtda Asalning yonida bo‘lgan ikki nafar erkak tanishi ushbu holatga aralashib, ulardan biri Izzatilloning yuziga bir marotaba urgan. Shundan so‘ng Asal o‘zining tanishlariga qo‘ng‘iroq qilib, ularni chaqirgan.
Asalning chaqiruviga binoan olti kishi kelgan. Ularning ichida ikki nafari ayol ham bo‘lgan. Shundan so‘ng ular bir guruh bo‘lib, shu kuni soat 03:40 da Samarqand shahar Beruniy ko‘chasi 82-uy oldida Izzatilloning sherigi Maqsudni haqoratlab, uning turli joylariga qo‘l va oyoqlari bilan urib, unga tan jarohatlari yetkazgan.
Shundan so‘ng uch nafar ayol va uch nafar erkak qo‘l va oyoqlari bilan Izzatilloning bosh qismi va tanasining turli sohalariga bir necha marotaba urib, og‘ir tan jarohati yetkazgan.
Ko‘rilgan tezkor chora tadbirlar natijasida Izzatilloga nisbatan jinoyatni sodir etgan shaxslardan uch nafari ichki ishlar xodimlari tomonidan ushlangan.
Ma’lum qilinishicha, Izzatilloga bosh miya suyaklarining og‘ir sinishi tashxisi qo‘yilgan.
Mazkur holat yuzasidan 20-noyabr, chorshanba kuni Samarqand shahar IIB huzuridagi tergov bo‘limi tomonidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.
Ko‘rsatilgan tibbiy muolajalarga qaramasdan 23-noyabr, shanba kuni Izzatillo shifoxonada vafot etgan. Shu kuni uning o‘lim sababini aniqlash maqsadida sudga oid tibbiy ekspertiza tayinlangan hamda jinoyat ishi Jinoyat kodeksining 104-moddasi 3-qismi “d” bandiga qayta malakalangan.
Dastlabki tergov jarayonida uch nafar shaxsga nisbatan Jinoyat kodeksining 104-moddasi 3-qismi “d” bandi va 277-moddasi 2-qismi “b” bandi bilan ayb e’lon qilinib, ularga nisbatan qamoqqa olish tarzidagi ehtiyot chorasi qo‘llanilgan va qolgan olti nafar gumon qilinuvchiga nisbatan tegishli ehtiyot choralarini qo‘llash masalasi ko‘rilmoqda. Hozirda jinoyat ishi bo‘yicha dastlabki tergov harakatlari olib borilmoqda.
Ma’lum qilinishicha, marhum Izzatillo M. 2016-yil 6-iyun kuni Mirzo Ulug‘bek nomidagi O‘zbekiston Milliy universitetini tamomlagan va shu yili Samarqand shahridagi 42-sonli umumta’lim maktabiga rus tili fanidan o‘qituvchi bo‘lib ishga kirgan. 2017-yil 25-sentabr kuni u ishdan bo‘shagan va Rossiyaga ishlash uchun ketgan. Izzatillo M. Rossiyadan 2018-yil avgust oyida qaytib kelgan.
2018-yil 3-sentabrda yana shu maktabga o‘qituvchi lavozimiga ishga qabul qilingan hamda o‘quvchilarga rus tilida tarix fanidan dars berib kelgan. Joriy yilning 17-oktabr kuni ishdan bo‘shashi haqida maktab direktorini og‘zaki ogohlantirgan va maktabga ishga bormay, shu vaqt mobaynida Samarqand shahri Mirzo Ulug‘bek va Shohrux ko‘chalari kesishuvchi chorrahasida somsa sotish bilan shug‘ullangan.
Mavzuga doir:
Izoh (0)