Албания мудофаа вазири Олта Жачка вайронакор зилзила оқибатида ҳалок бўлганларнинг исм-шарифини ўқиётганида йиғлаб юборди, деб хабар берди «РИА Новости».
Албанияда 26 ноябрга ўтар кечаси 6,4 магнитудали кучли зилзила содир бўлган. Энг кучли ер силкинишлари Тирана ва Дуррес шаҳарларида сезилган. У ерда бир қанча бинолар қулаб тушиб, уларнинг остида ҳалигача одамлар қолиб кетган бўлиши мумкин. Сўнгги маълумотларга кўра, 32 киши ҳалок бўлган, 658 киши жароҳат олган, 47 киши вайроналар остидан чиқариб олинган.
Албания бош вазири Эди Рама албан байроғи куни шарафига режалаштирилган тантанани қолдириб, миллий мотам кунини эълон қилди ҳамда Тирана ва Дурресда фавқулодда ҳолат тартибини жорий этди.
«Бу менинг энг оғир нутқим. Биз 26 ноябрда зилзила оқибатида вайрон бўлган биноларни қайтадан қуришимиз мумкин, лекин ҳалок бўлган фуқароларни ҳаётга қайтара олмаймиз», — дейди мамлакат мудофаа вазири.
Жачка ҳалок бўлганларнинг исм-шарифини ўқий бошлади, бироқ рўйхатнинг ўртасига келганда ўзини тутиб туролмайди ва йиғлаб юборди, кейин эса кўзлари тўла ёш билан ўқишни давом эттирди. Қурбонлар орасида 4 ва 8 ёшли болалар, 77 ва 79 ёшли кексалар, турли ёшдаги эркак ва аёллар бор.
Яна 25 киши бедарак йўқолган деб ҳисобланмоқда. Уларни вайроналар остидан қидириш ишлари давом этмоқда. Қутқарув операцияларида бир қанча давлатлардан келган мутахассислар иштирок этмоқда.
Июлда Албания президенти Илир Мета расмий мактуб орқали грек сейсмологи Акис Селентиснинг маълумотларига таяниб бош вазир Эди Рама, бош вазир ўринбосари Эрион Брача ва мудофаа вазири Жачкани Болқонда апокалиптик зилзилага тайёрланишга чақирганди. Ўшанда Жачка бунга жавобан албан сейсмологларига кўра, ҳалокатли зилзила эҳтимоли йўқ ва унинг идораси табиий офатларга 30 йил олдингидан кўра яхшироқ ҳозирлик кўрганини ёзган.
Изоҳ (0)