“O‘zbekkonsert” davlat muassasasi faoliyatini yanada takomillashtirish yuzasidan hukumatga taklif kiritilgan. Bu haqda O‘zbekiston madaniyat vaziri Baxtiyor Sayfullayev 27-noyabr kuni jurnalistlar bilan bo‘lib o‘tgan ochiq muloqotda ma’lum qildi.
Vazirning so‘zlariga ko‘ra, agar “O‘zbekkonsert” davlat muassasasi faoliyati tugatiladigan bo‘lsa, “ko‘p narsani yo‘qotamiz”.
“Agar biz kimningdir gapiga kirib, ‘O‘zbekkonsert’ muassasasini tugatadigan bo‘lsak, ko‘p narsani yo‘qotamiz. Yopish oson, tashkil qilish qiyin. Biz hozir hukumatga ‘O‘zbekkonsert’ faoliyatini takomillashtirish to‘g‘risida taklif kiritganmiz. Ochig‘ini aytaman, bu taklif ‘O‘zbekkonsert’ni yopish to‘g‘risida emas... Muassasa faoliyatini qayta ko‘rib chiqamiz”, — deya vazirning so‘zlaridan iqtibos keltirmoqda “Daryo” muxbiri.
Baxtiyor Sayfullayevning ta’kidlashicha, “O‘zbekkonsert”dan litsenziya olib faoliyat olib borayotgan san’atkorlarning bari tadbirkor hisoblanadi, tadbirkorlarning faoliyatini to‘xtatish esa mumkin emas.
“Bitta narsani tushunib olinglar, hurmatli ommaviy axborot vositalari xodimlari, ‘O‘zbekkonsert’ning litsenziyani qaytarib olishga haqi yo‘q. Bu — tadbirkorlik faoliyati. U litsenziyani 10 kunga to‘xtatadi va shu 10 kun ichida “O‘zbekkonsert” o‘sha tadbirkorni sudga beradi. Litsenziyani to‘xtatish yo bekor qilish sud vakolatiga kiradi”, — deya qo‘shimcha qildi O‘zbekiston madaniyat vaziri.
Eslatib o‘tamiz, “O‘zbekkonsert” davlat muassasasi 14-oktabrda xonanda Jahongir Otajonovning litsenziyasini tugatganini e’lon qilgan edi. Oradan ikki kun o‘tib, 16-oktabr kuni tashkilot nafaqat Jahongir Otajonovning, balki litsenziyasi undan avval tugatilgan xonandalar Shahlo Ahmedova, Abdulla Qurbonov va qiziqchi Halima Ibragimovaning litsenziyalari qaytarib berilganini e’lon qilgani jamoatchilik o‘rtasida shov-shuvlarga sabab bo‘lgandi.
Izoh (0)