Raqam: O‘zbekistonda 41 mingdan ortiq OITSga chalingan inson yashaydi

27-noyabr kuni Sanitariya-epidemiologik osoyishtalik agentligida 1-dekabr — Butunjahon OITSga qarshi kurash kuniga bag‘ishlangan anjuman o‘tkazildi. Bu haqda Sanitariya-epidemiologik osoyishtalik agentligi jamoatchilik bilan aloqalar bo‘limi “Daryo”ga xabar berdi.

Anjumanda BMTning OIV/OITS bo‘yicha birlashgan dasturi – YUNEYDS tashkilotining Sharqiy Yevropa va Markaziy Osiyodagi rahbari Viney Saldana, BMTning O‘zbekistondagi doimiy vakili Xelena Freyzer, BSSTning O‘zbekistondagi vakolatxonasi mas’ul mutaxassislari, BMTning giyohvandlik va jinoyatchilikka qarshi kurash qo‘mitasining mintaqaviy vakolatxonasi rahbari Ashitta Mital, UNISEF, Chegarasiz shifokorlar xalqaro tashkilotlarining O‘zbekistondagi vakolatxonasidan mas’ul mutaxassislari, nodavlat tashkilotlar vakillari, SSV huzuridagi Sanitariya-epidemiologik osoyishtalik agentligi rahbari va mas’ul yetakchi mutaxassislari, Respublika, Toshkent shahri va viloyati OITSga qarshi kurash markazlari rahbarlari va mutaxassislari qatnashdi.

Anjumanda OIV infeksiyasi bo‘yicha respublikadagi mavjud vaziyat, OIV infeksiyasining oldini olish borasida amalga oshirilayotgan ishlar va bunda xalqaro va nodavlat tashkilotlarining roli to‘g‘risida mavzular muhokama qilindi.

Tadbirda ta’kidlanganidek, 2013-yilning 23-sentabrida “Odamning immunitet tanqisligi virusi keltirib chiqaradigan kasallik (OIV infeksiyasi) tarqalishiga qarshi kurashish to‘g‘risida”gi qonunning qabul qilinishi bu boradagi ishlarni yanada yuqori bosqichga olib chiqishda muhim huquqiy asos bo‘ldi.

Shuningdek, 2018-yilda tasdiqlangan 2 ta 3493-sonli va 3800-sonli Prezident qarorlari OIV diagnostikasi sohasida yangi sifat darajasiga erishish, infeksiyani erta aniqlash, o‘z vaqtida profilaktika choralarini va OIV infeksiyasi bilan yashayotgan odamlarga tibbiy yordam ko‘rsatish, shuningdek, OIV infeksiyasiga qarshi kurash bo‘yicha mamlakatning dunyo hamjamiyati oldidagi xalqaro majburiyatlarini bajarilishini ta’minlamoqda.

Shu bilan birgalikda, OIV infeksiyasiga qarshi kurash va epidemiyaga samarali javob berish davlat va nodavlat tashkilotlari, jamoatchilik, jumladan, fuqarolik jamiyati uchun dolzarb vazifa bo‘lib qolmoqda.

Bugungi kunda O‘zbekistonda OIV infeksiyasi bilan yashovchi shaxslar soni 41 mingdan ortiq, ularning 57 foizini erkaklar va 43 foizini ayollar tashkil etmoqda.