«Ўзбекконцерт» давлат муассасаси фаолиятини янада такомиллаштириш юзасидан ҳукуматга таклиф киритилган. Бу ҳақда Ўзбекистон маданият вазири Бахтиёр Сайфуллаев 27 ноябрь куни журналистлар билан бўлиб ўтган очиқ мулоқотда маълум қилди.
Вазирнинг сўзларига кўра, агар «Ўзбекконцерт» давлат муассасаси фаолияти тугатиладиган бўлса, «кўп нарсани йўқотамиз».
«Агар биз кимнингдир гапига кириб, ‘Ўзбекконцерт’ муассасасини тугатадиган бўлсак, кўп нарсани йўқотамиз. Ёпиш осон, ташкил қилиш қийин. Биз ҳозир ҳукуматга ‘Ўзбекконцерт’ фаолиятини такомиллаштириш тўғрисида таклиф киритганмиз. Очиғини айтаман, бу таклиф ‘Ўзбекконцерт’ни ёпиш тўғрисида эмас... Муассаса фаолиятини қайта кўриб чиқамиз», — дея вазирнинг сўзларидан иқтибос келтирмоқда «Дарё» мухбири.
Бахтиёр Сайфуллаевнинг таъкидлашича, «Ўзбекконцерт»дан лицензия олиб фаолият олиб бораётган санъаткорларнинг бари тадбиркор ҳисобланади, тадбиркорларнинг фаолиятини тўхтатиш эса мумкин эмас.
«Битта нарсани тушуниб олинглар, ҳурматли оммавий ахборот воситалари ходимлари, ‘Ўзбекконцерт’нинг лицензияни қайтариб олишга ҳақи йўқ. Бу — тадбиркорлик фаолияти. У лицензияни 10 кунга тўхтатади ва шу 10 кун ичида «Ўзбекконцерт» ўша тадбиркорни судга беради. Лицензияни тўхтатиш ё бекор қилиш суд ваколатига киради», — дея қўшимча қилди Ўзбекистон маданият вазири.
Эслатиб ўтамиз, «Ўзбекконцерт» давлат муассасаси 14 октябрда хонанда Жаҳонгир Отажоновнинг лицензиясини тугатганини эълон қилган эди. Орадан икки кун ўтиб, 16 октябрь куни ташкилот нафақат Жаҳонгир Отажоновнинг, балки лицензияси ундан аввал тугатилган хонандалар Шаҳло Аҳмедова, Абдулла Қурбонов ва қизиқчи Ҳалима Ибрагимованинг лицензиялари қайтариб берилганини эълон қилгани жамоатчилик ўртасида шов-шувларга сабаб бўлганди.
Изоҳ (0)