Samarqandlik sobiq o‘qituvchi 15 kishi tomonidan kaltaklanishi oqibatida vafot etgani haqidagi xabar yuzasidan Bosh prokuratura rasmiy bayonot berdi.
20-noyabr kuni soat taxminan 03:40 larda Samarqand shahar Beruniy ko‘chasida fuqaro Jo‘rabek M. (1990-yilda tug‘ilgan ishchi) sheriklari Doniyor S. (1994-yilda tug‘ilgan, sudlangan, haydovchi) va Muhammad K.lar (1997-yilda tug‘ilgan, sudlangan, ishchi) bilan oldindan jinoiy til biriktirib, jamiyatda yurish-turish qoidalarini mensimasdan, shahardagi 42-sonli umumta’lim maktabi o‘qituvchisi Izzatilo M. bilan hech bir sababsiz janjallashib, janjal vaqtida qo‘l va oyoqlari bilan uni bosh qismi va tanasining turli sohalariga bir necha marotaba qasddan urib, hayoti uchun xavfli bo‘lgan tan jarohati yetkazgan.
Natijada Izzatilo M. shifoxonaga yotqizilgan. Shifokorlarning ma’lumotiga ko‘ra, Izzatilo M.ga “og‘ir yopiq KST, bosh miyaning og‘ir darajali lat yeyishi” tashxisi qo‘yilgan.
Mazkur holat yuzasidan shu kuni Samarqand shahar IIO FMB TB tomonidan Jinoyat kodeksining 104-moddasi 1-qismi bilan jinoyat ishi qo‘zg‘atilib, tergov harakatlari o‘tkazilgan.
Shifokorlar tomonidan ko‘rsatilgan muolajalarga qaramasdan 23-noyabr kuni Izzatilo M. jonlantirish bo‘limida vafot etgan.
23-noyabr kuni Jo‘rabek M., Doniyor S. va Muhammad K.lar JKning 104-moddasi 3-qismi “d” bandi bilan jinoyat ishida gumon qilinuvchi tariqasida jalb qilinib, protsessual tartibda ushlangan.
Jinoyat ishi bo‘yicha dastlabki tergov harakatlari Samarqand viloyati prokuraturasi tomonidan nazoratga olingan.
Natijalari bo‘yicha qo‘shimcha ravishda xabar qilinadi, deyiladi xabarda.
Avvalroq, ushbu janjal yuzasidan qo‘shimcha ma’lumotlar taqdim etilgan edi.
Izoh (0)