Dunyoda davlat va jamiyatning nufuzi, ong-u tafakkuri, madaniy darajasini ko‘rsatadigan mezonlar ko‘p. Lekin har qaysi millat va xalqning ma’naviy kamolotini uning xotin-qizlarga bo‘lgan munosabati, hurmat-ehtiromi bilan o‘lchash, baholash va belgilash mumkin. Shu nuqtai nazardan, ayollarni ulug‘lab, ardoqlab, boshiga ko‘tarib yashaydigan xalq o‘zining yuksak madaniyati va olijanob qadriyatlarini amalda namoyon qiladigan millat sifatida hurmatga loyiqdir.
Nigora Turdiyeva, “Oila” ilmiy-amaliy markazi Ishtixon tuman bo‘limi rahbari, Oliy Majlis Qonunchilik palatasi deputatligiga nomzod: Muqaddas tuyg‘ular timsoli
“Jannat onalarning oyog‘i ostidadir” degan hikmatli so‘zlar ham bejizga yangramagan. Zero mehribon, muqaddas ona siymosi oldida barchamiz bosh egib, ta’zim qilamiz. Ayol — ana shunday ulug‘ zot, muqaddas siymo.
Shu bois ham O‘zbekistonda ayollarning haq-huquqlarini himoya qilish, ularning jamiyat hayotida faol ishtirokini ta’minlash borasida hamma choralar ko‘rilgan, sharoitlar yaratilgan. Xotin-qizlarning ijtimoiy-siyosiy faolligini oshirish, ularning turli soha va tarmoqlarda o‘z qobiliyat hamda imkoniyatlarini ro‘yobga chiqarishi uchun munosib shart-sharoit yaratish, ularning qonuniy manfaatlariga so‘zsiz rioya qilinishiga erishish, onalik va bolalikni har tomonlama qo‘llab-quvvatlash, shuningdek, oila institutini mustahkamlash borasida keng ko‘lamli ishlar amalga oshirilmoqda.
Nasiba Abrayeva, Chiroqchi tumani xalq ta’limi bo‘limi mudiri, Oliy Majlis Qonunchilik palatasi deputatligiga nomzod: Ayollar har sohada ilg‘or
Bugun xotin-qizlarimizning qadami tegmagan joy, ular egallamagan soha qolmadi hisob. Ular o‘qituvchilik, xususiy tadbirkorlik, fermerlik, harbiylik, umuman, ijtimoiy sohadan tortib, iqtisodiyotu sanoatgacha — davlat va jamiyat qurilishi sohasida ham faollik ko‘rsatyapti. Qanchadan qancha soha va tarmoqlarda rahbarlik lavozimlarini egallayotgan xotin-qizlar soni ham muntazam ravishda ortib boryapti.
O‘nlab opa-singillarimiz “O‘zbekiston Qahramoni‘, “O‘zbekiston fan arbobi”, “O‘zbekiston xalq o‘qituvchisi”, “O‘zbekiston xalq shoiri”, “O‘zbekiston xalq artisti” singari davlatimizning yuksak faxriy unvonlariga, orden va medallariga sazovor bo‘lgan. Ularning orasida 500 nafardan ziyod fan doktori va akademiklar, minglab fan nomzodlari o‘z bilimi hamda iste’dodi bilan Vatanimiz ravnaqi yo‘lida sidqidildan xizmat qilib kelyapti.
Gulchehra Turlibekova, Arnasoy tumani 5-maktab direktori: Oila instituti mustahkamlandi
Darhaqiqat, yurtimiz mustaqillikka erishganidan so‘ng ayollar uchun nimaiki zarur bo‘lsa, barchasini muhayyo qilishga, nozik yelkasidagi og‘ir yuklardan xalos etishga, umuman, barcha islohotlarning markazida ayollar va bolalar turishi, ularga har tomonlama g‘amxo‘rlik ko‘rsatishni ta’minlashga katta e’tibor qaratildi.
Ayniqsa, Prezidentimiz Shavkat Mirziyoyev rahbarligida keyingi uch yil ichida xotin-qizlarga qaratilayotgan ulkan e’tibor, ko‘rsatilayotgan ehtirom va g‘amxo‘rliklar jamiyatimizda ayollarning mavqeyini yanada yuksaltirishga xizmat qilmoqda.Davlatimiz rahbarining 2018-yil 2-fevralda qabul qilingan “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi Farmoni bu borada ulkan o‘zgarishlarga poydevor bo‘lgan katta voqelik bo‘ldi.
Nodira Djanibekova, Sirdaryo viloyati qirg‘iz milliy madaniyat markazi rahbari, Oliy Majlis Qonunchilik palatasi deputatligiga nomzod: Kasbga tayyorlash va ishga joylashtirish masalasi
O‘zbekiston — iste’dodlar yurti. Beshikdan qabrgacha ilm izla, degan hikmatga asoslanib ulg‘ayadigan yoshlarimiz orasida har sohada yuqori natijalarga erishayotgan qizlar ham juda ko‘p.Ana shunday yosh qizlarimizni rag‘batlantirish, yuksak yutuqlar sari rag‘batlantirishda Zulfiya nomidagi Davlat mukofoti katta o‘rin tutadi. Yaxshi bilasiz, ilgari ushbu mukofotni qo‘lga kiritish uchun yosh chegarasi ancha kichik, g‘oliblar soni ham cheklangan edi.
Diqqatga molik jihati, endilikda mazkur mukofot ta’lim, fan, adabiyot, madaniyat, san’at, sport va jamoatchilik faoliyatida alohida yutuqlarga erishgan o‘n to‘rt yoshga to‘lgan va o‘ttiz yoshdan oshmagan iqtidorli qizlarga har yili Qoraqalpog‘iston Respublikasi, viloyatlar va Toshkent shahridan ikki nafar talabgorlarga beriladigan bo‘ldi. Bu ham o‘z sohasi va yo‘nalishida ulkan yutuqlarga erishayotgan qizlarimizga katta imkoniyat yaratmoqda, iqtidorli qizlarimiz safini yanada kengaytirishga xizmat qilmoqda.
Mavludaxon Adxamjonova, Andijon tumani ko‘p tarmoqli markaziy poliklinikasi mudiri, Oliy Majlis Qonunchilik palatasi deputatligiga nomzod: Go‘daklar o‘limi keskin kamaydi
Ayollarga yaratilayotgan sharoit va imkoniyatlarni sanab adog‘iga yetish qiyin. Ammo yana bir jihat borki, u haqda to‘xatilib o‘tmaslik mumkin emas. Bu — millatimiz kelajagi, naslimiz tozaligining muhim omil bo‘lgan salomatlik bilan bog‘liqdir.Faqat sog‘lom onadan sog‘lom farzand tug‘iladi, deymiz. Aslida ham to‘g‘ri gap. Boisi to‘rt muchasi sog‘lom, aql-zakovatli, ma’rifatli onalargina komil farzandlarni tarbiyalashga qodir bo‘ladi. Ana shu haqiqatni chuqur anglagan holda yurtimizda xotin-qizlarning salomatligini mustahkamlash, onalik va bolalikni muhofaza qilish, jismoniy va ma’naviy jihatdan yetuk yosh avlodni voyaga yetkazishga qaratilgan, uzoqni o‘ylab, puxta ishlab chiqilib, hayotga izchil joriy etilayotgan chora-tadbirlar, tegishli dasturlar o‘zining ijobiy samarasini beryapti.
Hozirgi paytda barcha hududlarimizda perinatal, skrining, reproduktiv salomatlik va diagnostika markazlari faoliyat ko‘rsatmoqda. Tug‘ruq bo‘limlari, ko‘p tarmoqli poliklinikalar va qishloq oilaviy poliklinikalari soni ortib bormoqda. Ushbu tibbiyot maskanlarida ayollar va qiz bolalar yil davomida chuqurlashtirilgan ko‘rikdan o‘tkazilib, ularga doimiy patronaj xizmati ko‘rsatilmoqda. Bu esa onalar va bolalar salomatligini mustahkamlash uchun zamin yaratayotir. Xotin-qizlarda uchraydigan kasalliklarni barvaqt aniqlash va davolash ishlari samarali tashkil etilayotgani tufayli ayollar o‘rtasida kasalliklar qariyb 2 barobar, onalar o‘limi 3 barobar, go‘daklar o‘limi esa salkam 4 barobar kamaygani buning yaqqol dalilidir.
Reklama huquqi asosida.
Izoh (0)