Дунёда давлат ва жамиятнинг нуфузи, онг-у тафаккури, маданий даражасини кўрсатадиган мезонлар кўп. Лекин ҳар қайси миллат ва халқнинг маънавий камолотини унинг хотин-қизларга бўлган муносабати, ҳурмат-эҳтироми билан ўлчаш, баҳолаш ва белгилаш мумкин. Шу нуқтаи назардан, аёлларни улуғлаб, ардоқлаб, бошига кўтариб яшайдиган халқ ўзининг юксак маданияти ва олижаноб қадриятларини амалда намоён қиладиган миллат сифатида ҳурматга лойиқдир.
Нигора Турдиева, «Оила» илмий-амалий маркази Иштихон туман бўлими раҳбари, Олий Мажлис Қонунчилик палатаси депутатлигига номзод: Муқаддас туйғулар тимсоли
«Жаннат оналарнинг оёғи остидадир» деган ҳикматли сўзлар ҳам бежизга янграмаган. Зеро меҳрибон, муқаддас она сиймоси олдида барчамиз бош эгиб, таъзим қиламиз. Аёл — ана шундай улуғ зот, муқаддас сиймо.
Шу боис ҳам Ўзбекистонда аёлларнинг ҳақ-ҳуқуқларини ҳимоя қилиш, уларнинг жамият ҳаётида фаол иштирокини таъминлаш борасида ҳамма чоралар кўрилган, шароитлар яратилган. Хотин-қизларнинг ижтимоий-сиёсий фаоллигини ошириш, уларнинг турли соҳа ва тармоқларда ўз қобилият ҳамда имкониятларини рўёбга чиқариши учун муносиб шарт-шароит яратиш, уларнинг қонуний манфаатларига сўзсиз риоя қилинишига эришиш, оналик ва болаликни ҳар томонлама қўллаб-қувватлаш, шунингдек, оила институтини мустаҳкамлаш борасида кенг кўламли ишлар амалга оширилмоқда.
Насиба Абраева, Чироқчи тумани халқ таълими бўлими мудири, Олий Мажлис Қонунчилик палатаси депутатлигига номзод: Аёллар ҳар соҳада илғор
Бугун хотин-қизларимизнинг қадами тегмаган жой, улар эгалламаган соҳа қолмади ҳисоб. Улар ўқитувчилик, хусусий тадбиркорлик, фермерлик, ҳарбийлик, умуман, ижтимоий соҳадан тортиб, иқтисодиёту саноатгача — давлат ва жамият қурилиши соҳасида ҳам фаоллик кўрсатяпти. Қанчадан қанча соҳа ва тармоқларда раҳбарлик лавозимларини эгаллаётган хотин-қизлар сони ҳам мунтазам равишда ортиб боряпти.
Ўнлаб опа-сингилларимиз «Ўзбекистон Қаҳрамони‘, «Ўзбекистон фан арбоби», «Ўзбекистон халқ ўқитувчиси», «Ўзбекистон халқ шоири», «Ўзбекистон халқ артисти» сингари давлатимизнинг юксак фахрий унвонларига, орден ва медалларига сазовор бўлган. Уларнинг орасида 500 нафардан зиёд фан доктори ва академиклар, минглаб фан номзодлари ўз билими ҳамда истеъдоди билан Ватанимиз равнақи йўлида сидқидилдан хизмат қилиб келяпти.
Гулчеҳра Турлибекова, Арнасой тумани 5-мактаб директори: Оила институти мустаҳкамланди
Дарҳақиқат, юртимиз мустақилликка эришганидан сўнг аёллар учун нимаики зарур бўлса, барчасини муҳайё қилишга, нозик елкасидаги оғир юклардан халос этишга, умуман, барча ислоҳотларнинг марказида аёллар ва болалар туриши, уларга ҳар томонлама ғамхўрлик кўрсатишни таъминлашга катта эътибор қаратилди.
Айниқса, Президентимиз Шавкат Мирзиёев раҳбарлигида кейинги уч йил ичида хотин-қизларга қаратилаётган улкан эътибор, кўрсатилаётган эҳтиром ва ғамхўрликлар жамиятимизда аёлларнинг мавқейини янада юксалтиришга хизмат қилмоқда.Давлатимиз раҳбарининг 2018 йил 2 февралда қабул қилинган «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги Фармони бу борада улкан ўзгаришларга пойдевор бўлган катта воқелик бўлди.
Нодира Джанибекова, Сирдарё вилояти қирғиз миллий маданият маркази раҳбари, Олий Мажлис Қонунчилик палатаси депутатлигига номзод: Касбга тайёрлаш ва ишга жойлаштириш масаласи
Ўзбекистон — истеъдодлар юрти. Бешикдан қабргача илм изла, деган ҳикматга асосланиб улғаядиган ёшларимиз орасида ҳар соҳада юқори натижаларга эришаётган қизлар ҳам жуда кўп.Ана шундай ёш қизларимизни рағбатлантириш, юксак ютуқлар сари рағбатлантиришда Зулфия номидаги Давлат мукофоти катта ўрин тутади. Яхши биласиз, илгари ушбу мукофотни қўлга киритиш учун ёш чегараси анча кичик, ғолиблар сони ҳам чекланган эди.
Диққатга молик жиҳати, эндиликда мазкур мукофот таълим, фан, адабиёт, маданият, санъат, спорт ва жамоатчилик фаолиятида алоҳида ютуқларга эришган ўн тўрт ёшга тўлган ва ўттиз ёшдан ошмаган иқтидорли қизларга ҳар йили Қорақалпоғистон Республикаси, вилоятлар ва Тошкент шаҳридан икки нафар талабгорларга бериладиган бўлди. Бу ҳам ўз соҳаси ва йўналишида улкан ютуқларга эришаётган қизларимизга катта имконият яратмоқда, иқтидорли қизларимиз сафини янада кенгайтиришга хизмат қилмоқда.
Мавлудахон Адхамжонова, Андижон тумани кўп тармоқли марказий поликлиникаси мудири, Олий Мажлис Қонунчилик палатаси депутатлигига номзод: Гўдаклар ўлими кескин камайди
Аёлларга яратилаётган шароит ва имкониятларни санаб адоғига етиш қийин. Аммо яна бир жиҳат борки, у ҳақда тўхатилиб ўтмаслик мумкин эмас. Бу — миллатимиз келажаги, наслимиз тозалигининг муҳим омил бўлган саломатлик билан боғлиқдир.Фақат соғлом онадан соғлом фарзанд туғилади, деймиз. Аслида ҳам тўғри гап. Боиси тўрт мучаси соғлом, ақл-заковатли, маърифатли оналаргина комил фарзандларни тарбиялашга қодир бўлади. Ана шу ҳақиқатни чуқур англаган ҳолда юртимизда хотин-қизларнинг саломатлигини мустаҳкамлаш, оналик ва болаликни муҳофаза қилиш, жисмоний ва маънавий жиҳатдан етук ёш авлодни вояга етказишга қаратилган, узоқни ўйлаб, пухта ишлаб чиқилиб, ҳаётга изчил жорий этилаётган чора-тадбирлар, тегишли дастурлар ўзининг ижобий самарасини беряпти.
Ҳозирги пайтда барча ҳудудларимизда перинатал, скрининг, репродуктив саломатлик ва диагностика марказлари фаолият кўрсатмоқда. Туғруқ бўлимлари, кўп тармоқли поликлиникалар ва қишлоқ оилавий поликлиникалари сони ортиб бормоқда. Ушбу тиббиёт масканларида аёллар ва қиз болалар йил давомида чуқурлаштирилган кўрикдан ўтказилиб, уларга доимий патронаж хизмати кўрсатилмоқда. Бу эса оналар ва болалар саломатлигини мустаҳкамлаш учун замин яратаётир. Хотин-қизларда учрайдиган касалликларни барвақт аниқлаш ва даволаш ишлари самарали ташкил этилаётгани туфайли аёллар ўртасида касалликлар қарийб 2 баробар, оналар ўлими 3 баробар, гўдаклар ўлими эса салкам 4 баробар камайгани бунинг яққол далилидир.
Реклама ҳуқуқи асосида.
Изоҳ (0)