O‘zbekistonda 27-noyabr kuni havo ochiq bo‘lishiga qaramay izg‘irin sovuq hukm suradi. Shu munosabat bilan Yong‘in xavfsizligi boshqarmasi aholini isitish moslamalaridan foydalanishda hushyor bo‘lishga chaqirgan, Toshkent viloyati IIBB esa Chimyonga ketayotganlarga murojaat bilan chiqish qildi. Sovuq sabab hududlarda gaz va elektr ta’minotida uzilishlar bo‘lyapti, qiziq tomoni, Davlat soliq qo‘mitasi bu vaziyatda tadbirkorlarni tushunishini va ularni jazolamasligini bildirdi.
Qashqadaryoda pasportida erkak deb ko‘rsatilgan 54 yoshli ayol pensiyaga chiqa olmay sarson bo‘lmoqda. “Pasport stoli”dagilar xatolikni o‘shandayoq tuzatib bergan, lekin ayol bazada erkakligicha qolib ketgan (shunchaki, qog‘ozda tuzatib berishgan, xolos). Bilasiz, O‘zbekistonda erkaklar 60 yoshdan pensiyaga chiqadi...
Musulmonlar idorasi: “Telegram’dagi pul tikib o‘ynaladigan o‘yinlar qimor hisoblanadi”. Idoraning birdan bunday bayonot berishi bejiz emas — bir muddat avval O‘zbekistonda totalizatorlar (bukmekerlik muassasalari) faoliyati 2021-yildan qayta tiklanishi mumkinligi haqidagi xabarlar paydo bo‘lgan edi.
Andijon hokimi Shuhratbek Abdurahmonov 15 ming so‘mga talabalar oshxonasida tushlik qildi. Aytishlaricha, u Andijon davlat universitetiga yo‘l-yo‘lakay, talabalar bilan suhbatlashish uchun kirgan (u talabalar bilan suhbatlashishi uchun biror dars qoldirilganmi-yo‘qmi, bunga aniqlik kiritilmagan). Talabalar bilan muloqotda hokim yoshlarni chuqur bilim egallashga va bo‘lajak parlament saylovlarida faol ishtirok etishga chaqirgan.
Firibgarliklar, tovlamachiliklar, talon-torojlar, qotilliklar. Farg‘onalik ayol tadbirkordan videolarini tarqatib yuborish bilan qo‘rqitib, 60 ming dollar talab qildi. Toshkent viloyatida begona xonadonga adashib kirgan ruhiy xasta erkak uy egasini o‘ta shafqatsizlik bilan o‘ldirdi. Farg‘onada “Makarov” to‘pponchasini sotayotgan otaxon qo‘lga olindi. 211 nafar fuqaroning 611 million so‘mini o‘zlashtirgan xususiy bandlik agentligining litsenziyasi to‘xtatildi. Shahrixonda “Obod mahalla” dasturiga ajratilgan mablag‘lar o‘zlashtirilgani haqidagi xabarga rasmiy munosabat bildirildi. Chiroqchida yana bir qo‘ng‘ir ayiq otib o‘ldirildi, lekin ovchilar jazosiz qolmoqda.
O‘zbekistonda yana nima yangiliklar? Shavkat Mirziyoyev Tatariston prezidentini qabul qildi. Senat 30 noyabrda yig‘iladi. Navoiydagi oltin konida portlatish ishlaridan oldin aholi ogohlantirilayotgani ma’lum qilindi. Bosh prokuratura Qoraqalpog‘istonda YHXB xodimi bilan janjaldan so‘ng vafot etgan fuqaro haqida ma’lumot berdi. Xalq ta’limi vazirligi o‘qituvchilarning saylov jarayoniga jalb etilayotgani haqidagi ma’lumotga izoh berdi. O‘zbekistonda asosiy turdagi qishloq xo‘jaligi mahsulotlarining zaxira hajmlari belgilandi. Buxorolik maktab o‘quvchisi organ vakili uni urib, jinoyatni o‘z bo‘yniga olishni talab qilganini bildirdi. AQSh elchixonasi viza olmoqchi bo‘lgan o‘zbekistonliklarga murojaat qildi. O‘zbekistonda mahsulotlarni markirovkalash bilan Alisher Usmonovga aloqador kompaniya shug‘ullanishi ma’lum bo‘ldi. Namangan va Sverdlovsk viloyatlari o‘rtasida hamkorlik kelishuvi imzolandi. Futbolchi Odil Ahmedovning akasi deputatlikka o‘z nomzodini qo‘ydi. Uzbekistan Airways chiptalari nega qimmatligi aytildi. Milliy gvardiya tomonidan qo‘riqlanadigan obyektlar ro‘yxati tasdiqlandi.
Jahonda-chi? Afg‘oniston sobiq prezidenti amaldagi davlat rahbari atrofidagilarni tinchlik tarafdorlariga bosim o‘tkazganlikda aybladi. Oq uy boshqaruvi rahbarining muovini iste’foga chiqdi. Malida ikkita vertolyot to‘qnashuvi oqibatida 13 nafar fransiyalik harbiy halok bo‘ldi. Xitoy AQShning Gonkong bo‘yicha qabul qilgan qonun loyihasiga norozilik bildirdi. Tehronda norozilik namoyishlaridan keyin hukumatni qo‘llab-quvvatlashga qaratilgan miting o‘tkazildi. Turkiyaning Antaliya shahri xorijlik turistlarni qabul qilish bo‘yicha rekord o‘rnatdi. Yevropa Ittifoqi xakerlari IShID axborot resursini ishdan chiqardi. BMT, Iordaniya, Livan va Iroq Nur-Sultonda Suriyadagi vaziyat muzokaralarida kuzatuvchi sifatida ishtirok etadi. Xorvatiyada 20 ming o‘qituvchi norozilik namoyishlariga chiqdi.
Chet eldagi o‘zbekistonliklar haqida. Sankt-Peterburgda o‘zbekistonlik erkak mashinada olib ketilib, telefon parolini aytmaguncha qo‘yib yuborilmadi. Rossiyada o‘zbekistonlik yigit o‘yinchoq to‘pponcha bilan bankni o‘marmoqchi bo‘ldi.
Bu testni o‘tkazib yubormang lekin: 2,5 million oylik, go‘sht, propiska haqida kim nima degan? Iqtibosni aytgan amaldorni toping.
Izoh (0)