O‘zbekiston Oliy Majlis Senatining 24-yalpi majlisi 30-noyabr, shanba kuni Toshkent shahrida bo‘lib o‘tadi. Bu haqdagi qaror Senat Kengashining majlisida qabul qilindi.
Dastlab yalpi majlisda ilk bor qabul qilingan “2020-yil uchun O‘zbekiston Respublikasining Davlat budjeti to‘g‘risida”gi qonun muhokama qilinadi.
Shuningdek, yalpi majlisda “O‘zbekiston Respublikasi Vazirlar Mahkamasi to‘g‘risida”gi qonunning yangi tahriri, “Volontyorlik faoliyati to‘g‘risida”gi, “Kasaba uyushmalari to‘g‘risida”gi, “1993-yil 22-yanvardagi Fuqarolik, oilaviy va jinoyat ishlari bo‘yicha huquqiy yordam hamda huquqiy munosabatlar to‘g‘risidagi Konvensiyaga doir Bayonnomani (Moskva, 1997-yil 28-mart) ratifikatsiya qilish haqida”gi qonunlar ko‘rib chiqiladi.
Majlis kun tartibidan “Faol investitsiyalar va ijtimoiy rivojlanish yili” davlat dasturining 2019-yil 3-choragidagi ijrosi yuzasidan Vazirlar Mahkamasining hisoboti eshituvi o‘rin olgan. Shu bilan birga, senatorlar tadbirkorlik subyektlarini tugatish tartibi takomillashtirilishi, bola huquqlarining kafolatlari yanada kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritishga qaratilgan qonunlarni muhokama qiladi.
Samarqand shahri va Samarqand tumani chegaralarini o‘zgartirish, Vazirlar Mahkamasiga bojxona organlari tomonidan qonun hujjatlarining ijro etilishi holati, arzon uy-joy qurilishi, gaz va elektr ta’minoti bilan bog‘liq parlament so‘rovlarini yuborish to‘g‘risidagi masalalar ham majlis kun tartibiga kiritilgan.
Izoh (0)