Ijtimoiy tarmoqlarda “Zaharli oltin koni sabab farzandlarimiz yurak xastaliklari bilan dunyoga kelmoqda” nomli tanqidiy material chop etilgan. Bu haqda Navoiy viloyatining Uchquduq tuman hokimligi axborot xizmati ma’lum qildi.
Uchquduq tumani Kokpatas qo‘rg‘oni yaqinidagi Shimoliy kon boshqarmasining “Sharqiy” ochiq usulda ruda qazib olish konida portlatish ishlari olib borishdan oldin aholini ogohlantiruvchi sirenadan foydalanilmoqda.
Huquqiy hujjatlar va tegishli nizomga asosan, aholi yashash punktidan 1,5 kilometr radius uzoqlikda portlatish ishlarini olib borish yuzasidan tuman hokimligi tomonidan ShKB ma’muriyati ogohlantirilgan.
Shuningdek, murojaatda kondagi portlatish ishlarining amalga oshirilishi oqibatida turli kasalliklar, chaqaloqlarning yurak xastaliklari bilan dunyoga kelayotgani haqida iddao qilinadi. Lekin Uchquduq tuman tibbiyot birlashmasi va ShKB 2-tibbiy-sanitariya qismi mutaxassis vrachlari tomonidan taqdim etilgan tahlillarga ko‘ra, so‘nggi uch yilda Kokpatas qo‘rg‘onida yashovchi ayollar tomonidan 16 ta tug‘ruq bo‘lgan. Shundan 1 ta holatda egizak farzandlar tug‘ilib, jami 17 nafar chaqaloq dunyoga kelgan.
Ularning barchasi tug‘ma nuqsonlarsiz, yurak xastaliklarisiz tug‘ilgan.
Shimoliy kon boshqarmasining “Sharqiy” ochiq usulda ruda qazib olish konidan olingan ohaktoshni maydalash uchun foydalanilgan “Maydalash-saralash kompleksi”dan atmosferaga ko‘tarilayotgan chang-to‘zonni bartaraf etish maqsadida doimiy ravishda namlantirish ishlari olib borilyapti.
“Yuqorida ta’kidlanganidek, portlatish ishlari aniq grafik asosida bir vaqtda amalga oshirilib, bu haqda mahalla aholisi oldindan tanishtirilmoqda”, — deyiladi xabarda.
Izoh (0)