Ўзбекистонда 27 ноябрь куни ҳаво очиқ бўлишига қарамай изғирин совуқ ҳукм суради. Шу муносабат билан Ёнғин хавфсизлиги бошқармаси аҳолини иситиш мосламаларидан фойдаланишда ҳушёр бўлишга чақирган, Тошкент вилояти ИИББ эса Чимёнга кетаётганларга мурожаат билан чиқиш қилди. Совуқ сабаб ҳудудларда газ ва электр таъминотида узилишлар бўляпти, қизиқ томони, Давлат солиқ қўмитаси бу вазиятда тадбиркорларни тушунишини ва уларни жазоламаслигини билдирди.
Қашқадарёда паспортида эркак деб кўрсатилган 54 ёшли аёл пенсияга чиқа олмай сарсон бўлмоқда. «Паспорт столи»дагилар хатоликни ўшандаёқ тузатиб берган, лекин аёл базада эркаклигича қолиб кетган (шунчаки, қоғозда тузатиб беришган, холос). Биласиз, Ўзбекистонда эркаклар 60 ёшдан пенсияга чиқади...
Мусулмонлар идораси: «Telegram’даги пул тикиб ўйналадиган ўйинлар қимор ҳисобланади». Идоранинг бирдан бундай баёнот бериши бежиз эмас — бир муддат аввал Ўзбекистонда тотализаторлар (букмекерлик муассасалари) фаолияти 2021 йилдан қайта тикланиши мумкинлиги ҳақидаги хабарлар пайдо бўлган эди.
Андижон ҳокими Шуҳратбек Абдураҳмонов 15 минг сўмга талабалар ошхонасида тушлик қилди. Айтишларича, у Андижон давлат университетига йўл-йўлакай, талабалар билан суҳбатлашиш учун кирган (у талабалар билан суҳбатлашиши учун бирор дарс қолдирилганми-йўқми, бунга аниқлик киритилмаган). Талабалар билан мулоқотда ҳоким ёшларни чуқур билим эгаллашга ва бўлажак парламент сайловларида фаол иштирок этишга чақирган.
Фирибгарликлар, товламачиликлар, талон-торожлар, қотилликлар. Фарғоналик аёл тадбиркордан видеоларини тарқатиб юбориш билан қўрқитиб, 60 минг доллар талаб қилди. Тошкент вилоятида бегона хонадонга адашиб кирган руҳий хаста эркак уй эгасини ўта шафқатсизлик билан ўлдирди. Фарғонада «Макаров» тўппончасини сотаётган отахон қўлга олинди. 211 нафар фуқаронинг 611 миллион сўмини ўзлаштирган хусусий бандлик агентлигининг лицензияси тўхтатилди. Шаҳрихонда «Обод маҳалла» дастурига ажратилган маблағлар ўзлаштирилгани ҳақидаги хабарга расмий муносабат билдирилди. Чироқчида яна бир қўнғир айиқ отиб ўлдирилди, лекин овчилар жазосиз қолмоқда.
Ўзбекистонда яна нима янгиликлар? Шавкат Мирзиёев Татаристон президентини қабул қилди. Сенат 30 ноябрда йиғилади. Навоийдаги олтин конида портлатиш ишларидан олдин аҳоли огоҳлантирилаётгани маълум қилинди. Бош прокуратура Қорақалпоғистонда ЙҲХБ ходими билан жанжалдан сўнг вафот этган фуқаро ҳақида маълумот берди. Халқ таълими вазирлиги ўқитувчиларнинг сайлов жараёнига жалб этилаётгани ҳақидаги маълумотга изоҳ берди. Ўзбекистонда асосий турдаги қишлоқ хўжалиги маҳсулотларининг захира ҳажмлари белгиланди. Бухоролик мактаб ўқувчиси орган вакили уни уриб, жиноятни ўз бўйнига олишни талаб қилганини билдирди. АҚШ элчихонаси виза олмоқчи бўлган ўзбекистонликларга мурожаат қилди. Ўзбекистонда маҳсулотларни маркировкалаш билан Алишер Усмоновга алоқадор компания шуғулланиши маълум бўлди. Наманган ва Свердловск вилоятлари ўртасида ҳамкорлик келишуви имзоланди. Футболчи Одил Аҳмедовнинг акаси депутатликка ўз номзодини қўйди. Uzbekistan Airways чипталари нега қимматлиги айтилди. Миллий гвардия томонидан қўриқланадиган объектлар рўйхати тасдиқланди.
Жаҳонда-чи? Афғонистон собиқ президенти амалдаги давлат раҳбари атрофидагиларни тинчлик тарафдорларига босим ўтказганликда айблади. Оқ уй бошқаруви раҳбарининг муовини истеъфога чиқди. Малида иккита вертолёт тўқнашуви оқибатида 13 нафар франциялик ҳарбий ҳалок бўлди. Хитой АҚШнинг Гонконг бўйича қабул қилган қонун лойиҳасига норозилик билдирди. Теҳронда норозилик намойишларидан кейин ҳукуматни қўллаб-қувватлашга қаратилган митинг ўтказилди. Туркиянинг Анталия шаҳри хорижлик туристларни қабул қилиш бўйича рекорд ўрнатди. Европа Иттифоқи хакерлари ИШИД ахборот ресурсини ишдан чиқарди. БМТ, Иордания, Ливан ва Ироқ Нур-Султонда Суриядаги вазият музокараларида кузатувчи сифатида иштирок этади. Хорватияда 20 минг ўқитувчи норозилик намойишларига чиқди.
Чет элдаги ўзбекистонликлар ҳақида. Санкт-Петербургда ўзбекистонлик эркак машинада олиб кетилиб, телефон паролини айтмагунча қўйиб юборилмади. Россияда ўзбекистонлик йигит ўйинчоқ тўппонча билан банкни ўмармоқчи бўлди.
Бу тестни ўтказиб юборманг лекин: 2,5 миллион ойлик, гўшт, прописка ҳақида ким нима деган? Иқтибосни айтган амалдорни топинг.
Изоҳ (0)