“Paxtakor” stadioni buziladi va uning o‘rnida yangisi quriladi, biroq qachonligi hali noma’lum

Toshkentdagi “Paxtakor” markaziy stadioni buzilib, uning o‘rnida yangi o‘yingoh qad rostlaydi.

“Paxtakor” vakilining “Daryo”ga ma’lum qilishicha, stadionni buzish ishlari qachon boshlanishi va klub keyingi mavsum o‘yinlarini qaysi stadionda o‘tkazishi hozircha noma’lum.

Biroz muddat avval futbol yangiliklarni yoritishga mo‘ljallangan mahalliy OAV “Paxtakor” 2020-yilda uy uchrashuvlarini “JAR” stadionida o‘tkazishi haqida xabar bergandi.

“Daryo”ning PFLdagi manbasi Superliga 25-turidan o‘rin olgan “Paxtakor”—“Bunyodkor” uchrashuvi “Bunyodkor” stadionida bo‘lib o‘tishi ma’lum qildi. Biroq mazkur jamoalarning o‘rinbosarlari o‘rtasidagi bahs “Paxtakor” stadionida bo‘lib o‘tadi.

Shu tariqa Superliga 23-turidan o‘rin olgan “Paxtakor —“Surxon” (3:1) uchrashuvi mazkur stadionda o‘tkazilgan so‘nggi bahs bo‘lib qolishi mumkin.

Eslatib o‘tamiz, “Paxtakor” yangi stadionga ega bo‘lishi haqidagi xabarlar 2017-yilda yangragandi. O‘shanda klub sarmoyadori SFI Management Group bir qator loyihalarni ko‘rib chiqayotgani aytilgandi.