Buni ko‘rish kerak! Bir kunda 2 ta sovrin yutgan “Flamengo”ni Rio ko‘chalarida 100 minglab muxlislar kutib oldi

Libertadores Kubogini qo‘lga kiritgan “Flamengo” klubi Braziliya chempionatida ham g‘olib bo‘ldi.

23-noyabr, shanba oqshomida braziliyaliklar klubi “River Pleyt”ni mag‘lub etgan holda Libertadores Kubogiga ega chiqqandi. 24-noyabr, yakshanba kuni esa “Flamengo” Braziliya chempionatini ham yutib oldi. Chempionat tugashiga to‘rt tur qolganida “Flamengo” 81 ochko bilan muddatidan avval chempionlikni qo‘lga kiritdi. Shu tariqa “Flamengo” o‘n yil deganda ilk bor va o‘z tarixida yettinchi marta Braziliya chempioniga aylandi.

Shuningdek, “Flamengo” bir yilning ichida ham Libertadores Kubogi, ham milliy chempionatda g‘olib chiqqan so‘nggi 56 yil ichidagi ilk jamoa bo‘ldi.

Mazkur g‘alabalardan so‘ng “Flamengo” Rio de Janeyro shahri ko‘chalari bo‘ylab parad uyushtirdi. Ko‘chaga minglab ishqibozlar to‘plandi. Buning oqibatida aholi va politsiya o‘rtasida to‘qnashuvlar ham bo‘lgan.