O‘zbekiston Markaziy banki Prezidentning “Inflyatsion targetlash rejimiga bosqichma-boshqich o‘tish orqali pul-kredit siyosatini takomillashtirish to‘g‘risida”gi farmoniga muvofiq Inflyatsion targetlashga o‘tish orqali pul-kredit siyosatini amalga oshirishning 2020—2022-yillar davriga mo‘ljallangan asosiy yo‘nalishlarini e’lon qildi. Bu haqda “Sof.uz” xabar berdi.
Farmonga muvofiq, 2023-yildan inflyatsiyaning 5 foizlik doimiy maqsadli ko‘rsatkichiga erishish rejalashtirilmoqda. 2021-yilda esa inflyatsiyani 10 foizgacha pasaytirish maqsadi belgilangan.
Markaziy bank prognozlariga ko‘ra, 2020-yilda yalpi ichki mahsulot hajmining real o‘sishi 5,2—5,5 foizni tashkil etadi, 2021—2022-yillarda esa 5,5—5,8 foizgacha tezlashadi.
Mavzuga doir: O‘zbekiston Markaziy banki 2020-yildan inflyatsion targetlash rejimiga o‘tishni boshlaydi
Shuningdek, dastlabki hisob-kitoblarga ko‘ra, kelgusi yillarda to‘lov balansining joriy operatsiyalar hisobvarag‘i manfiy saldosi YaIMga nisbatan 2020-yildagi 7 foizdan 2022-yilda 5,9 foizgacha pasayib boradi. Ushbu taqchillikning asosan tashqi moliyaviy manbalar, xususan, investitsion resurslar hisobidan qoplanib borishi natijasida valyuta almashuv kursiga sezilarli devalvatsion bosimni yuzaga keltirmasligi kutilmoqda.
Asosiy ssenariy bo‘yicha yillik inflyatsiya darajasi 2020-yil oxirida 12—13,5 foiz oralig‘ida bo‘lib, 2021-yilda bir xonali son darajasiga tushadi va 2023-yilda esa asosiy 5 foizlik targetga erishiladi.
Ushbu ssenariyga ko‘ra, tashqi iqtisodiy sharoitlarning joriy tendensiyalari saqlanib qolib, asosiy savdo hamkor davlatlar iqtisodiyotida keskin o‘zgarishlar yuzaga kelmaydi hamda asosiy eksport tovarlari narxlari va transchegaraviy pul o‘tkazmalar o‘sishining ijobiy dinamikasi saqlanib qoladi.
Izoh (0)