Joriy yilning to‘qqiz oyida O‘zbekistonda xotin-qizlar tomonidan sodir etilgan umumiy jinoyatlar soni o‘tgan yilning mos davriga nisbatan 4361 tadan 2886 taga yoki 33,8 foizga, jinoyatda ishtirok etgan xotin-qizlar soni esa 4882 nafardan 3254 nafarga yoki 33,3 foizga kamaygan. Bu haqda O‘zA xabar berdi.
Xabar berilishicha, Toshkentda O‘zbekiston Xotin-qizlar qo‘mitasi va BMT Taraqqiyot dasturining “Davlat boshqaruvida ayollarning huquq va imkoniyatlarini kengaytirish va ijtimoiy-iqtisodiy hayotdagi faolligini oshirish” qo‘shma loyihasi doirasida zo‘ravonlik va uning turlari, ayollarni zo‘ravonlikdan himoya qilish, bu borada ayollar bilan ishlashning o‘ziga xos jihatlari yuzasidan xalqaro tajribani inobatga olgan holda inspektorlar uchun seminar-trening o‘tkazildi.
Qayd etilishicha, mushkul ahvolga tushgan xotin-qizlarga yordam berish uchun joylarda reabilitatsiya va moslashtirish markazlari tashkil etilgan. Hozirda 194 ta shunday markaz ishlab turibdi. Ushbu markazlarda zo‘ravonlikka uchragan, og‘ir vaziyatga tushib qolgan, inqiroz holatidagi xotin-qizlarga zudlik bilan yordam ko‘rsatish maqsadida “1146” ishonch raqami ishga tushirilgan.
Bu borada respublika, viloyat va tuman (shahar) ichki ishlar organlari tizimida xotin-qizlar bilan ishlash masalalari bo‘yicha 360 ta inspektor shtati joriy etildi. Ular zimmasiga O‘zbekiston Xotin-qizlar qo‘mitasi, “Oila” ilmiy-amaliy tadqiqot markazi, mahalla faollari, mahallalardagi xotin-qizlar bilan ishlash va ular o‘rtasida huquqbuzarliklarning oldini olish choralarini ko‘rish vazifalari yuklatilgan.
Hamkorlikdagi tadbirlar davomida 4615 nafar xotin-qizga ishga joylashishda ko‘maklashilgan, 4420 nafariga moddiy va ijtimoiy yordam ko‘rsatildi, 1457 nafarining davolashga muhtojligi aniqlanib, tibbiy dispanserlarga yuborildi, 1457 nafariga shaxsini tasdiqlovchi hujjatni qayta tiklashda amaliy yordam ko‘rsatildi, 2723 nafariga tadbirkorlik faoliyatini yo‘lga qo‘yishda ko‘maklashildi, 1046 nafari ta’lim muassasalariga qaytarildi.
Shuningdek, 208 nafar ayolning “Zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish markazlari”ga yuborilishi ta’minlandi.
Joriy yilning to‘qqiz oyida yoshlar tomonidan sodir etilgan jinoyatlar o‘tgan yilning shu davriga nisbatan 37,9 foizga yoki 9925 tadan 6163 taga, jinoyatda ishtirok etgan yoshlar soni 23,4 foizga yoki 12079 nafardan 9248 nafarga kamaygan.
Izoh (0)