AQShning Norvegiyadagi elchisi harbiy dengiz kuchlari vaziri lavozimiga tayinlandi

AQSh prezidenti Donald Tramp iste’foga chiqayotgan harbiy dengiz kuchlari vaziri Richard Spenser o‘rniga Amerikaning Norvegiyadagi favqulodda va muxtor elchisi Kennet Breytueytni lavozimga tayinladi. Bu haqda “Interfaks” xabar berdi.

“AQShning Norvegiyadagi favqulodda va muxtor elchisi, admiral Ken Breytueytni harbiy dengiz kuchlarining vaziri lavozimiga tayinladim. U harbiy sohada ko‘plab yutuq va muvaffaqiyatga erishgan inson Kenning mehnatkash odam ekaniga aslo shubha qilmayman!”, — deb yozgan Donald Tramp Twitter’dagi rasmiy sahifasida.

U dengiz piyodasi Edvard Gallaxer ishi bo‘yicha sud jarayonidan norozi ekanligini ham ma’lum qilgan.

“AQSh mudofaa vaziri Mark Esper tomonidan Harbiy dengiz floti vaziri Richard Spenserning rahbarlik faoliyati to‘xtatilishiga ushbu ishning ham aloqasi bor. Richardga qilgan xizmatlari va vatanparvarligi uchun minnatdorlik bildiraman. Eddi tinch yo‘l bilan tegishli tartibda tantanali ravishda hurmat-ehtirom bilan iste’foga chiqadi”, — deb yozgan Tramp.Avval Pentagon rahbari Mark Esperning Harbiy dengiz kuchlari vaziri Richard Spenserning iste’foga chiqishini so‘ragani xabar qilingandi.