Eron hukumati norozilik namoyishlaridagi fitnachilar orasida IShID a’zolari borligini ma’lum qildi

Eronning Karmonshoh viloyatidagi norozilik namoyishlari terrorchilik tashkilotlari, jumladan, IShID a’zolari tomonidan tashkillashtirilgani aniqlandi. Bu haqda Karmonshoh viloyati gubernatori Hushang Bazvandaning Press TV telekanali orqali qilgan bayonotiga tayanib “RIA Novosti” xabar bergan.

“Fitnachi isyonkorlar Karmonshohdagi ko‘plab korxonalarga hujum uyushtirgan. Ular Kurdistondagi ozod hayot pariyasi (PJAK), IShID va “Eron xalqi mujohidlari tashkiloti”ning a’zolari bo‘lgan. Jinoyatchilar shaxsi politsiya va xavfsizlik idoralari tomonidan aniqlangan va ular qonunda belgilangan tartibda jazolanadi”, — deya ta’kidlagan Bazvand.

Gubernator namoyishlar vaqtida bezorilarning nafaqat politsiya, balki tinch aholi vakillariga ham hujum uyushtirgani, davlat mulkiga va viloyatdagi korxonalarga jiddiy zarar yetkazganini ma’lum qilgan.

Eronda aholining norozilik namoyishlari 16-noyabrda hukumatning benzin narxini oshirish haqidagi qarorni imzolagani oqibatida boshlangan. Eron politsiyasi namoyishchilarni tarqatish uchun ularga nisbatan o‘qotar quroldan foydalangan. Noroziliklar tufayli 16-noyabr kuni Eronda internet o‘chirib qo‘yildi. Vashington Eron hukumatining mamlakatda boshlangan noroziliklar tufayli internetni o‘chirib qo‘yganini keskin qoraladi va namoyishchilar tomonida ekanligini ma’lum qildi. Eron benzin narxi oshgani tufayli moddiy zarar ko‘rgan aholiga ko‘rilgan zararni qoplash uchun subsidiyalar ajratgan. Eron oliy yetakchisi Ali Xomanaiy mamlakatda benzin narxining oshishi sabab boshlangan xalq noroziliklarini xorijdagi dushmanlarning fitnasi deb atagan. Eron prezidenti Hasan Ruhoniy esa ushbu norozilik namoyishlari ortida maqsadi mamlakat xavfsizligiga tahdid qilish bo‘lgan AQSh hamda Isroil turganini taxmin qilgan.

Keyinchalik Eronning 21 ta shahridagi norozilik namoyishlarida qurbon bo‘lganlarning soni 106 nafarga yetgani, Erondagi norozilik namoyishlari vaqtida politsiya qo‘lga tushirgan bezorilar o‘t qo‘yilgan har bir bino uchun 60 AQSh dollari miqdorida mukofotga ega bo‘lganini tan olgan. AQSh namoyishlar vaqtida internet o‘chirilgani uchun Eron aloqa vaziriga nisbatan sanksiya qo‘llagan. Eron vitse-prezidenti Is’hoq Jahongiriy Yaqin Sharq mintaqasidagi mamlakatlarning mamlakatdagi norozilik namoyishlarida ishtirok etgani aniqlansa, ularga “qaqshatqich zarba” berilishini va’da qilgan. AQSh davlat departamenti esa Facebook va Twitter’ni Eron hukumati vakillarining akkauntlarini bloklashga chaqirgan.