AQSh respublikachilar partiyasi senatori Lindsi Grem Oq uyning iltimosiga ko‘ra Senatda armanlar ommaviy qirg‘ini haqidagi rezolyutsiyani ovozga qo‘yishni bekor qildi, deya xabar bergan “Interfaks”.
“Oq uyda Turkiya prezidenti bilan uchrashuv o‘tkazilganidan keyin biz Senatda yig‘ilish o‘tkazib bu masalani muhokama qildik”, — deydi Grem.
Gremning so‘zlariga ko‘ra, qonunchilik masalalari bo‘yicha Oq uy vakili senator Bob Menendesning armanlar ommaviy qirg‘ini borasidagi rezolyutsiyani ovozga qo‘ymoqchi ekanini aytib, undan ushbu jarayonni to‘xtatishni so‘ragan.
“Bu ishni qilganimning yagona sababi Erdo‘g‘onning shahar hududida bo‘lgani bilan bog‘liq. Uning tashrifi vaqtida rezolyutsiyaning ovozga qo‘yilishi noto‘g‘ri harakat bo‘lardi. Men AQSh hamda Turkiya o‘rtasidagi munosabatlarni imkon darajasida qutqarib qolishga urinyapman”, — degan senator Lindsi Grem.
Senator Menendesning rezolyutsiyasini bloklagan siyosatchi kelasi safar bu kabi qarorlarga e’tiroz bildirmasligini ma’lum qildi.
O‘tgan haftada Menendes va senator Ted Kruz armanlar ommaviy qirg‘ini haqidagi rezolyutsiyani yana muhokamaga qo‘ygan. Bu safar hujjat boshqa bir senator Devid Perdyu tomonidan rad qilingan.
“Senator Perdyu rezolyutsiyaning qabul qilinishi anchayin nozik muammolarni yuzaga keltirishi mumkinligidan xavotirda. U Turkiya va mintaqadagi boshqa ittifoqdoshlar bilan munosabatlarni chigallashtiradi”, — deya vaziyatga izoh bergan Perdyuning vakili.
Mavzuga doir: Erdo‘g‘on: Bundan bir asr avvalgi hodisalar haqida siyosatchilar emas, tarixchilar gapirishi kerak
Rezolyutsiya uchun kongresmenlarning 405 nafari ovoz bergan, 11 nafar siyosatchi ushbu qarorga qarshi chiqqan. Hujjat demokratlar vakili Adam Shiff tomonidan vakillar palatasi muhokamasiga qo‘yilgandi.
Izoh (0)