AQSh davlat kotibi Mayk Pompeo iste’foga chiqmoqchi

AQSh davlat kotibi Mayk Pompeo o‘z lavozimini tark etib, Senatga saylanish uchun o‘z nomzodini qo‘yishni rejalashtirmoqda. Bu haqda Time xabar berdi.

Pompeo Davlat departamentida 2020-yil bahoriga qadar qolishni ko‘zlagandi, ammo Donald Trampga impichment e’lon qilingani amaldorning rejalari o‘zgarishiga turtki bo‘ldi. Time nashrining manbalariga asoslanib yozishicha, ushbu jarayonning silliq kechishi ko‘p jihatdan Pompeoning o‘ziga bog‘liq.

Tramp va uning atrofidagilar Pompeodan norozi hamda u Oq uy manfaatlarini himoya qilishga yetarli darajada urinmayotganini bildirmoqda.

Mayk Pompeoning AQSh prezidenti bilan iste’foni kelishgan yoki kelishmagani ham noma’lum. Avval davlat kotibining yordamchilari uning ketishini inkor qilgandi, biroq ular Time’ga bu borada izoh berishdan bosh tortgan.

CNN telekanali oktabrda Pompeo hamda davlat departamentining boshqa xodimlari o‘rtasidagi vaziyatning keskinlashgani, idora vakillari uning faol emasligidan norozi bo‘lgandi. Ularning fikricha Pompeo Trampning noodatiy fikrlarini to‘g‘ri talqin qila olmaydi.