Ijtimoiy tarmoqlarda Qashqadaryoda viloyati IIBning yangi rahbari topshirig‘iga ko‘ra, profilaktika inspektorlari har kuni 10 ta ma’muriy bayonnoma tuzishi, IIB jamg‘armasiga MIB yoki soliqchi kabi pul tushirish majburiyati yuklangani xususidagi xabarlar tarqaldi. “Daryo” muxbiri ushbu xabarlarga aniqlik kiritish maqsadida viloyat IIB axborot xizmati rahbari Iroda Rasulova bilan bog‘landi.
“Kunda-kunora sodir etiladigan huquqbuzarliklar, qoidabuzarliklarga keskin choralar ko‘rilmasa, kelgusida bu ayanchli oqibatlarni yuzaga keltirishi aniq. Ayniqsa, jamoat joyida sodir etilgan huquqbuzarliklarni aniqlab jazolash bu profilaktika. Nafaqat yangi rahbariyat, ilgari ishlab ketgan har bir rahbar ham IIB xodimlariga huquqbuzarlik uchun jazo muqarrarligini tushuntirib qo‘yish, kerak bo‘lsa, har bir fuqaro ongiga singdirishi lozimligini ta’kidlardi. Bu uning ishi. Birinchidan, qoidabuzarliklarni sodir etgan shaxslar vaqtida profilaktika qilinmasa, kelgusida jinoyat sodir etishi tayin. Ikkinchidan, atrof-tevarakda bu holni kuzatayotgan fuqarolar bundan xulosa chiqarib, kelgusida bu kabi holatlar ma’muriy javobgarlikka sabab bo‘lishi mumkinligini yaxshiroq anglaydi. Fuqarolari vatanparvar, har qanday huquqbuzarlik yoki jinoyatga karshi murosasiz kurashayotgan, hududi toza va ozoda, noqonuniy qurilishlar bo‘lmagan, jinoyat sodir etilishiga yo‘l qo‘ymagan, ekologik talablarga to‘liq javob beradigan, egasiz turar joylarni aniqlab, xonadon sohibini muntazam ogohlantiradigan, xalq dardi bilan yashab, fuqarolar roziligiga erishgan profilaktika inspektorlaridan ma’muriy huquqbuzarlik bo‘yicha hujjatlar so‘rashning o‘zi nojoiz bo‘lib, bunday xodimlar doimiy ravishda rag‘batlantirib kelinmoqda”, — deydi Iroda Rasulova.
Iroda Rasulova Telegram’da tarqalgan “tezkor xodimlardan esa hududda ilgari ochilmay qolgan jinoyatlarni bir hafta muddatda ochish talab etilmoqda. Aks holda lavozimda qolish yoki qolmaslik masalasi ko‘riladi” – deyilgan savolga quyidagicha javob berdi:
“Jinoyatchilikni imkon qadar tezroq fosh etish zamon va IIB kasbiga qo‘yilgan talabdir. Bugun davr shuni talab qilyaptiki, egallab turgan lavozimi doirasida ish yurita olmagan u o‘qituvchimi, shifokormi yoki boshqa soha vakilimi vazifasidan ozod etilmoqda. Shifokordan jinoyatni ochishni, o‘qituvchidan qonunbuzarlikka qarshi kurashishni yoki ichki ishlar organlari xodimlaridan bemorni davolashni talab qilish mantiqqa zid. Ammo IIB xodimidan jinoyatchilik haqida so‘rash, ochilmagan jinoyatni tezroq fosh etish talabi qo‘yilishi tabiiy. Bu faqatgina hozirgi rahbariyat tomonidan emas, doimiy ravishda rahbarlar tomonidan o‘rtaga tashlangan talabdir. Vazifa jinoyatni ochishmi, shu ish uchun maosh olyaptimi, ro‘zg‘or tebratyaptimi mas’uliyatni anglab harakat qilish kerak-da. Ana shunda xalq xizmatchisi bo‘lishdek sharafli va mas’uliyatli vazifani uddalagan bo‘lamiz”.
Izoh (0)