Ижтимоий тармоқларда Қашқадарёда вилояти ИИБнинг янги раҳбари топшириғига кўра, профилактика инспекторлари ҳар куни 10 та маъмурий баённома тузиши, ИИБ жамғармасига МИБ ёки солиқчи каби пул тушириш мажбурияти юклангани хусусидаги хабарлар тарқалди. «Дарё» мухбири ушбу хабарларга аниқлик киритиш мақсадида вилоят ИИБ ахборот хизмати раҳбари Ирода Расулова билан боғланди.
«Кунда-кунора содир этиладиган ҳуқуқбузарликлар, қоидабузарликларга кескин чоралар кўрилмаса, келгусида бу аянчли оқибатларни юзага келтириши аниқ. Айниқса, жамоат жойида содир этилган ҳуқуқбузарликларни аниқлаб жазолаш бу профилактика. Нафақат янги раҳбарият, илгари ишлаб кетган ҳар бир раҳбар ҳам ИИБ ходимларига ҳуқуқбузарлик учун жазо муқаррарлигини тушунтириб қўйиш, керак бўлса, ҳар бир фуқаро онгига сингдириши лозимлигини таъкидларди. Бу унинг иши. Биринчидан, қоидабузарликларни содир этган шахслар вақтида профилактика қилинмаса, келгусида жиноят содир этиши тайин. Иккинчидан, атроф-теваракда бу ҳолни кузатаётган фуқаролар бундан хулоса чиқариб, келгусида бу каби ҳолатлар маъмурий жавобгарликка сабаб бўлиши мумкинлигини яхшироқ англайди. Фуқаролари ватанпарвар, ҳар қандай ҳуқуқбузарлик ёки жиноятга карши муросасиз курашаётган, ҳудуди тоза ва озода, ноқонуний қурилишлар бўлмаган, жиноят содир этилишига йўл қўймаган, экологик талабларга тўлиқ жавоб берадиган, эгасиз турар жойларни аниқлаб, хонадон соҳибини мунтазам огоҳлантирадиган, халқ дарди билан яшаб, фуқаролар розилигига эришган профилактика инспекторларидан маъмурий ҳуқуқбузарлик бўйича ҳужжатлар сўрашнинг ўзи ножоиз бўлиб, бундай ходимлар доимий равишда рағбатлантириб келинмоқда», — дейди Ирода Расулова.
Ирода Расулова Telegram’да тарқалган «тезкор ходимлардан эса ҳудудда илгари очилмай қолган жиноятларни бир ҳафта муддатда очиш талаб этилмоқда. Акс ҳолда лавозимда қолиш ёки қолмаслик масаласи кўрилади» – дейилган саволга қуйидагича жавоб берди:
«Жиноятчиликни имкон қадар тезроқ фош этиш замон ва ИИБ касбига қўйилган талабдир. Бугун давр шуни талаб қиляптики, эгаллаб турган лавозими доирасида иш юрита олмаган у ўқитувчими, шифокорми ёки бошқа соҳа вакилими вазифасидан озод этилмоқда. Шифокордан жиноятни очишни, ўқитувчидан қонунбузарликка қарши курашишни ёки ички ишлар органлари ходимларидан беморни даволашни талаб қилиш мантиққа зид. Аммо ИИБ ходимидан жиноятчилик ҳақида сўраш, очилмаган жиноятни тезроқ фош этиш талаби қўйилиши табиий. Бу фақатгина ҳозирги раҳбарият томонидан эмас, доимий равишда раҳбарлар томонидан ўртага ташланган талабдир. Вазифа жиноятни очишми, шу иш учун маош оляптими, рўзғор тебратяптими масъулиятни англаб ҳаракат қилиш керак-да. Ана шунда халқ хизматчиси бўлишдек шарафли ва масъулиятли вазифани уддалаган бўламиз».
Изоҳ (0)