Shri-Lankaning saylangan prezidenti Gotabaya Rajapaks 18-noyabrda Anuradxapuri shahrida joylashgan qadimgi budda ibodatxonasida prezidentlik qasamyodini amalga oshirdi. Respubliksaning federal kanallari inauguratsiya jarayonini to‘g‘ridan-to‘g‘ri translyatsiya qilgan. Bu haqda “RIA Novosti” xabar berdi.
Shri-Lankada prezidentlik saylovlari 16-noyabr, shanba kuni bo‘lib o‘tgan. Saylov komissiyasi ma’lumoti bo‘yicha Rajapaks 52,25 foiz ovoz to‘plab saylovlarda g‘olib chiqqan. Uning asosiy raqobatchisi boshqaruv partiyasi vakili Sajit Premedasning natijasi 42 foizni tashkil etgan. U rasmiy natijalar e’lon qilinishidan ilgari raqibining g‘alabasi va o‘z mag‘lubiyatini tan olgan.
Shanba kuni o‘tkazilgan saylovlarda aholining 84 foiz qismi ishtirok etdi va bu mamlakat tarixida prezidentlik uchun saylovlardagi rekord natija. Garchi mamlakatdagi kam sonli tamillar va musulmonlar o‘z ovozlarini Premedasga bergan bo‘lsa ham, Rajapaks mamlakatda milliy va diniy ajratishlarga qarshi ekanligini ta’kidladi.
Rajapaks prezidentlikka saylanishidan avval Shri-Lanka mudofaa vaziri o‘rinbosari lavozimida faoliyat olib borgan. U 1983-yildan 2009-yilgacha davom etgan tamil separatistlariga qarshi fuqarolar urushida qozonilgan g‘alabadan keyin mamlakatda katta obro‘ orttirgandi. Prezident saylovoldi dasturida mamlakatda iqtisodiy islohotlar o‘tkazish va xavfsizlik tizimlarini mustahkamlashga e’tibor qaratish ko‘zda tutilgan.
Tahlilchilarning fikricha Rajapaksning mamlakatda xavfsizlikni ta’minlashga e’tibor qaratishni va’da bergani joriy yil bahoridan buyon Shri-Lankadagi teraktlardan qo‘rqib qolgan xalqning ishonchini qozonishda muhim omil bo‘lib xizmat qilgan.Mavzuga doir: Shri-Lankada komendantlik soati joriy etildi
Izoh (0)