Шри-Ланканинг сайланган президенти Готабая Ражапакс 18 ноябрда Анурадхапури шаҳрида жойлашган қадимги будда ибодатхонасида президентлик қасамёдини амалга оширди. Республиксанинг федерал каналлари инаугурация жараёнини тўғридан-тўғри трансляция қилган. Бу ҳақда «РИА Новости» хабар берди.
Шри-Ланкада президентлик сайловлари 16 ноябрь, шанба куни бўлиб ўтган. Сайлов комиссияси маълумоти бўйича Ражапакс 52,25 фоиз овоз тўплаб сайловларда ғолиб чиққан. Унинг асосий рақобатчиси бошқарув партияси вакили Сажит Премедаснинг натижаси 42 фоизни ташкил этган. У расмий натижалар эълон қилинишидан илгари рақибининг ғалабаси ва ўз мағлубиятини тан олган.
Шанба куни ўтказилган сайловларда аҳолининг 84 фоиз қисми иштирок этди ва бу мамлакат тарихида президентлик учун сайловлардаги рекорд натижа. Гарчи мамлакатдаги кам сонли тамиллар ва мусулмонлар ўз овозларини Премедасга берган бўлса ҳам, Ражапакс мамлакатда миллий ва диний ажратишларга қарши эканлигини таъкидлади.
Ражапакс президентликка сайланишидан аввал Шри-Ланка мудофаа вазири ўринбосари лавозимида фаолият олиб борган. У 1983 йилдан 2009 йилгача давом этган тамил сепаратистларига қарши фуқаролар урушида қозонилган ғалабадан кейин мамлакатда катта обрў орттирганди. Президент сайловолди дастурида мамлакатда иқтисодий ислоҳотлар ўтказиш ва хавфсизлик тизимларини мустаҳкамлашга эътибор қаратиш кўзда тутилган.
Таҳлилчиларнинг фикрича Ражапакснинг мамлакатда хавфсизликни таъминлашга эътибор қаратишни ваъда бергани жорий йил баҳоридан буён Шри-Ланкадаги терактлардан қўрқиб қолган халқнинг ишончини қозонишда муҳим омил бўлиб хизмат қилган.Мавзуга доир: Шри-Ланкада комендантлик соати жорий этилди
Изоҳ (0)