Davlat statistika qo‘mitasi O‘zbekistonda chakana savdo aylanmasi haqida ma’lumot berdi.
Qayd etilishicha, respublika bo‘yicha joriy yilning yanvar-oktabr oyida chakana savdo tovar aylanmasi 129,5 trillion so‘mni tashkil etib, o‘tgan yilning shu davriga nisbatan 7,0 foizga o‘sdi.
Yirik korxonalarning tovar aylanmasi 20,5 trillion so‘mni (o‘sish sur’ati 28,6 foiz), kichik biznes va xususiy tadbirkorlik subyektlarining tovar aylanmasi 108,9 trillion so‘mni (o‘sish sur’ati 3,7 foiz), shundan uyushmagan savdo tovar aylanmasi 13,04 trillion so‘mni (o‘tgan yilning shu davriga nisbatan 10,9 foizga kamaygan) tashkil etdi.
2018-yilning shu davriga nisbatan respublikaning barcha hududlarida chakana savdo tovar aylanmasining o‘sish sur’atlari kuzatilib, nisbatan yuqori o‘sish sur’atlari Xorazm, Samarqand, Navoiy, Namangan viloyatlari va Qoraqalpog‘iston Respublikasida qayd etildi.
Chakana savdo tovar aylanmasi tarkibida yirik korxonalarning tovar aylanmasi hajmi o‘tgan yilning mos davriga nisbatan 28,6 foizga o‘sdi va 20,5 trillion so‘mni tashkil qildi. Bu esa umumiy savdo hajmining 15,9 foiz ulushiga to‘g‘ri keladi.
Kichik biznes va xususiy tadbirkorlik subyektlarining chakana savdo tovar aylanmasi hajmi statistik hisob-kitoblarga ko‘ra, 108,9 trillion so‘mni tashkil etib, 2018-yilning yanvar-oktabr oyiga nisbatan 3,7 foizga o‘sdi. Respublika miqyosida ushbu sektorning jami chakana savdo tovar aylanmasidagi ulushi 84,1 foizga teng kelmoqda.
Tahliliy natijalarga ko‘ra, chakana savdo tovar aylanmasida kichik biznes va xususiy tadbirkorlik subyektlarining ulushi bo‘yicha Qashqadaryo (96,8 foiz), Sirdaryo (94,6 foiz), Toshkent (90,5 foiz), Surxondaryo (89,7 foiz) va Namangan (87,5 foiz) viloyatlari yetakchilik qilmoqda.
Chakana tovar aylanmasi tarkibida yirik korxonalarning ulushi 15,9 foizni tashkil etib, eng katta ulush Toshkent shahrida (28,1 foiz), Xorazm viloyatida (24,9 foiz) va Buxoro viloyatida (14,0 foiz) kuzatilgan.
2019-yil yanvar-oktabr oyida o‘tgan yilning mos davriga nisbatan respublikaning barcha hududlarida o‘sish ko‘rsatkichlarini tashkil etdi.
Ushbu ko‘rsatkichni boshqa hududlar bilan solishtirganda eng yuqorisi Toshkent shahri (12,2 million so‘m), Navoiy (5,2 million so‘m) va Toshkent (4,9 million so‘m) viloyatlari hissasiga to‘g‘ri keladi. Buning sababi ushbu hududlarda yirik savdo va sanoat tashkilotlari joylashgan.
2019-yil yanvar-oktabr holatiga o‘rtacha aholi jon boshiga chakana savdo tovar aylanmasi — 3,8 million so‘m (o‘tgan yilning mos davri bilan solishtirganda 5,0 foizga o‘sgan).
Shuningdek, 2019-yilning yanvar-oktabr oyi mobaynida chakana savdo tovar aylanmasi tarkibida ovqatlanish tashkilotlarining savdo aylanmasi 2,8 foizni tashkil etib, 3,6 trillion so‘mga yetdi va o‘tgan yilning mos davriga nisbatan 7,7 foizga o‘sdi. Bunda jami savdo aylanmasining 83,6 foiz ulushi kichik biznes va xususiy tadbirkorlik subyektlari ulushiga to‘g‘ri kelmoqda.
Yil boshidan respublika bo‘yicha ulgurji savdo tovar aylanmasi 63 121,2 milliard so‘mni tashkil qildi va o‘tgan yilning mos davriga nisbatan 5,8 foizga o‘sgan.
Ulgurji savdo tovar aylanmasida eng yuqori hajm kichik tadbirkorlik subyektlariga to‘g‘ri kelib, mazkur hajm 2019-yil yanvar-oktabr oyi yakunlariga ko‘ra, 44 579,7 milliard so‘mni tashkil etib, o‘tgan yilning shu davriga nisbatan 4,7 foizga o‘sgan.
Ushbu sektorning umumiy ulgurji savdo aylanmasidagi ulushi esa 70,6 foizni tashkil qilmoqda. Bu ko‘rsatkich boshqa viloyatlar bilan taqqoslanganda, Toshkent shahrida (79,5 foiz), Farg‘ona (79,8 foiz), Samarqand (70,0 foiz), Andijon (68,4 foiz) va Buxoro (68,0 foiz) viloyatlarida yuqori bo‘lgan.
Izoh (0)