O‘zbekistonda xizmat ko‘rsatgan madaniyat xodimi, shoir Bobur Bobomurod “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad tashkillashtirdi.
Bobur Bobomurod suhbat davomida “Ravon mingim kelyapti, paxta tergim kelyapti” mazmunida she’r o‘qigan shoir Sharofiddin Boltaboyevga Andijon hokimi Chevrolet Nexia sovg‘a qilgani hamda shoirni ijtimoiy tarmoqlarda maddoh deb atayotganlarga munosabat bildirdi.
https://youtu.be/2IkjAOeyBRM?t=44m36s
Avvalo, maddoh tushunchasiga kelaylik, bilaman hozir bu gapni gapirganimdan keyin yana tosh otadiganlar ko‘payib ketadi. Bunga ham tayyorman, bemalol, gapiraverishsin. Chunki, internetda ba’zan gapingizni uzib olib yoki ko‘zingizni yumib qolsangiz ham ‘uxlab qolibdi’ deb, kulib tushsangiz, shoir mazza qilyapti deb gapirishadi. O‘zini saviyasiga mos, o‘ziga moslab oladi.Lekin, ‘maddoh’ degan so‘z, har kim o‘ziga ma’qulini ko‘radi. Uni qo‘lidan to‘rtta so‘zni yozish kelsa, birovning tug‘ilgan kuni bo‘ladi, birovni ulug‘lash kerak bo‘ladi, o‘sha zamonlarda ham bo‘lgan bu narsa, hozir ham bor, bundan keyin ham bo‘ladi. Bu bizga bog‘liq emas.
O‘ylashimcha, qashshoq, g‘arib shoirlarni davri o‘tdi. Hozir zamon unaqa emas. Nimaga endi to‘rtta pulni to‘rtta pulga urib, to‘rtta tangani aylantirib, bemalol yashab yurish mumkin-u, u bechora g‘oyibdan ilhom kutib, ‘she’rim o‘xsharmikin, ertaga ikkita odamni og‘ziga tusharmikin, yodlab bir kishi aytarmikin, qo‘shiq bo‘larmikin’, degan umid bilan yozadi-da, yana maddoh bo‘lib qolishiga hayronman.
O‘sha gapirayotgan odamlar maddoh deydi, pulga sig‘inayotganlarchi? Bu-ku maddohlik qilibdi, pulga sig‘inib Xudoni unutib qo‘yganlarchi? Yoki bolasidan kechib, pul, mansab, amal deganda nafsini jilovlay olmaganlar qancha. Men birovni g‘iybat qilmoqchi emasman.
Sharofiddin akani o‘sha she’rini o‘qidim. Menga ham g‘alati tuyuldi, erish tuyuldi. Keyin o‘sha she’rni to‘liq variantini topib o‘qidim, katta she’r ekan. Yoshligini, bolaligini eslagan, ko‘nglini yozgan. Xo‘p, orasida hokimni yozibdi, ismi-sharifini yozibdi, yashirmagan, aylantirmagan, paxtani o‘rab qo‘ymagan, ‘Aka, mard bo‘lsangiz, tanti bo‘lsangiz, bizgay ham bitta bering, unisiga berdingiz, bunisiga berdingiz, davlatingiz kamayib qolmaydi’ degan ma’noda o‘xshaydimi, o‘xshamaydimi? — deb yozgan, o‘xshab qoldi.
Hokimni ham tantiligi tutdi, ‘Ravon’ nima bo‘libdi, Andijonda ‘Ravon’ chiqadi, bervorishibdi. Mayli, hamma shoirga bersin. Odamlarga iltimos qilaman, bunaqa yomon, g‘arazli gaplarni aytmanglar. Tasavvur qilinglar, Sharofiddin aka lotereya o‘ynadi, lotereyada shu mashinani yutdi. Omadini bersin, bizga ham nasib qilsin.
Bobur Bobomurod, O‘zbekistonda xizmat ko‘rsatgan madaniyat xodimi
Izoh (0)