«Ҳамма шоирга берсин». Бобур Бобомурод Андижон ҳокими Nexia совға қилган шоир ва уни маддоҳ деяётганлар ҳақида гапирди (видео)

Ўзбекистонда хизмат кўрсатган маданият ходими, шоир Бобур Бобомурод «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

Бобур Бобомурод суҳбат давомида «Ravon мингим келяпти, пахта тергим келяпти» мазмунида шеър ўқиган шоир Шарофиддин Болтабоевга Андижон ҳокими Chevrolet Nexia совға қилгани ҳамда шоирни ижтимоий тармоқларда маддоҳ деб атаётганларга муносабат билдирди.

https://youtu.be/2IkjAOeyBRM?t=44m36s

Аввало, маддоҳ тушунчасига келайлик, биламан ҳозир бу гапни гапирганимдан кейин яна тош отадиганлар кўпайиб кетади. Бунга ҳам тайёрман, бемалол, гапираверишсин. Чунки, интернетда баъзан гапингизни узиб олиб ёки кўзингизни юмиб қолсангиз ҳам ‘ухлаб қолибди’ деб, кулиб тушсангиз, шоир мазза қиляпти деб гапиришади. Ўзини савиясига мос, ўзига мослаб олади.

Лекин, ‘маддоҳ’ деган сўз, ҳар ким ўзига маъқулини кўради. Уни қўлидан тўртта сўзни ёзиш келса, бировнинг туғилган куни бўлади, бировни улуғлаш керак бўлади, ўша замонларда ҳам бўлган бу нарса, ҳозир ҳам бор, бундан кейин ҳам бўлади. Бу бизга боғлиқ эмас.

Ўйлашимча, қашшоқ, ғариб шоирларни даври ўтди. Ҳозир замон унақа эмас. Нимага энди тўртта пулни тўртта пулга уриб, тўртта тангани айлантириб, бемалол яшаб юриш мумкин-у, у бечора ғойибдан илҳом кутиб, ‘шеърим ўхшармикин, эртага иккита одамни оғзига тушармикин, ёдлаб бир киши айтармикин, қўшиқ бўлармикин’, деган умид билан ёзади-да, яна маддоҳ бўлиб қолишига ҳайронман.

Ўша гапираётган одамлар маддоҳ дейди, пулга сиғинаётганларчи? Бу-ку маддоҳлик қилибди, пулга сиғиниб Худони унутиб қўйганларчи? Ёки боласидан кечиб, пул, мансаб, амал деганда нафсини жиловлай олмаганлар қанча. Мен бировни ғийбат қилмоқчи эмасман.

Шарофиддин акани ўша шеърини ўқидим. Менга ҳам ғалати туюлди, эриш туюлди. Кейин ўша шеърни тўлиқ вариантини топиб ўқидим, катта шеър экан. Ёшлигини, болалигини эслаган, кўнглини ёзган. Хўп, орасида ҳокимни ёзибди, исми-шарифини ёзибди, яширмаган, айлантирмаган, пахтани ўраб қўймаган, ‘Ака, мард бўлсангиз, танти бўлсангиз, бизгай ҳам битта беринг, унисига бердингиз, бунисига бердингиз, давлатингиз камайиб қолмайди’ деган маънода ўхшайдими, ўхшамайдими? — деб ёзган, ўхшаб қолди.

Ҳокимни ҳам тантилиги тутди, ‘Ravon’ нима бўлибди, Андижонда ‘Ravon’ чиқади, берворишибди. Майли, ҳамма шоирга берсин. Одамларга илтимос қиламан, бунақа ёмон, ғаразли гапларни айтманглар. Тасаввур қилинглар, Шарофиддин ака лотерея ўйнади, лотереяда шу машинани ютди. Омадини берсин, бизга ҳам насиб қилсин.

Бобур Бобомурод, Ўзбекистонда хизмат кўрсатган маданият ходими