Farg‘ona shahar hokimligi matbuot xizmati “Oliy sudgacha yugurtirilgan tadbirkorlar. Farg‘ona shahar hokimligi nega mulkni tortib olmoqchi bo‘ldi?” sarlavhasi ostida e’lon qilingan maqolaga nisbatan rasmiy bayonot berdi.
Maqolada 25 yil muqaddam davlat tasarrufidan chiqarilgan va xususiylashtirilgan ko‘chmas mulk obyektlari Farg‘ona shahar hokimligi da’vosiga asosan ma’muriy sudlar tomonidan davlat zaxirasiga tortib olinayotgani haqida edi.
Ushbu maqola yuzasidan Farg‘ona shahar hokimligi o‘z nuqtai nazari qat’iy ekanligini bildiradi.
2012-yil 20-martda Silk Manufacture MChJ va Silver Silk Company MChJ xorijiy korxonasini birlashtirish natijasida Constant Trading MChJ qo‘shma korxonasi tashkil etilgan va davlat ro‘yxatidan o‘tkazilgan. Sobiq korxonalarga tegishli Farg‘ona shahar “Buyuk ipak yo‘li” OAJning 59 270,65 metr kvadratdan iborat yer maydoni va unda joylashgan bino-inshootlari Constant Trading qo‘shma korxonasi ixtiyoriga o‘tgan.
Lekin ushbu korxonaning 6,24 gektar yer maydoni va unda joylashgan bino-inshootlaridan 2012-yildan buyon samarali foydalanmay kelingan. Bironta ham yangi ish o‘rni yaratilmagan.
O‘zbekiston Prezidentining 2018-yil 4-sentabrdagi “Tadbirkorlarning ishlab chiqarish maydonlaridan foydalanishlarini yanada rag‘batlantirish chora-tadbirlari to‘g‘risida”gi PQ-3928-son qarori ijrosi yuzasidan shaharda o‘tkazilgan xatlov natijalariga ko‘ra, ushbu korxonada yuqorida qayd etilgan salbiy holatlar bartaraf etilmaganligi aniqlangan.
Bo‘sh turgan binolarni aniqlash bo‘yicha idoralararo komissiyassining 2019-yil 19-fevraldagi 74-son bayoni xulosasiga ko‘ra, mazkur obyekt “Bo‘sh turgan va foydalanmayotgan obyekt” sifatida e’tirof etilib, komissiya tomonidan ta’sirchan soliq mexanizmini qo‘llash yuzasidan qaror qabul qilingan. Shunga qaramay, 2019-yil mart oyidan boshlab korxona mulkdorlari 4 oy o‘tib ham xulosa chiqarmagan.
Joriy yil 18-iyulda Farg‘ona shahar ma’muriy sudi sayyor sud majlisida joyiga chiqib o‘rganilganda, korxona samarasiz faoliyat ko‘rsatgani, yangi ish o‘rni yaratilmaganligi va investitsiya majburiyatlari bajarilmaganligi o‘z tasdig‘ini topgan. Natijada Farg‘ona shahar ma’muriy sudining shu kungi hal qiluv qaroriga ko‘ra da’vogar Farg‘ona shahar hokimligining arizasi qanoatlantirilgan.
Farg‘ona viloyati Ma’muriy sudi o‘zining 2019-yil 29-avgustdagi qarori bilan Constant Trading qo‘shma korxonasining apellyatsiya shikoyatini qanoatlantirishni rad etib, nizoli obyektni davlat zaxirasida qoldirgan.
Mulkdor tomonidan ishlab chiqilgan loyihaga asosan 2019-yilning 18-fevraliga qadar obyektga jami 1 milliard so‘m hamda 1 million AQSh dollari miqdorida investitsiya jalb etilishi ko‘zda tutilgan. Lekin investitsiya lozim darajada kiritilmagan hamda obyektdan samarali foydalanish choralari ko‘rilmagan.
Viloyat bojxona boshqarmasining ma’lumotiga asosan, Constant Trading qo‘shma korxonasi tomonidan 2018 -ildan 2019-yil noyabr oyigacha umuman mahsulot eksportini amalga oshirmagan.
Farg‘ona shahar investitsiya bo‘limining ma’lumotiga ko‘ra, O‘zbekiston Prezidentining PQ-3928-son qarorining 4-bandi “b” kichik bandiga asosan, Constant Trading qo‘shma korxonasiga 2019-yil 1-yanvardan ta’sirchan soliq mexanizmi qo‘llanilgan va natijada 180 million so‘m undirilgan. Shundan so‘ng ham korxona mulkdorlari tomonidan korxona umumiy maydonining 4,81 gektar yer maydoni va bino-inshootlaridan samarali foydalanish maqsadida tarmoq jadvallari ishlab chiqilmagan taqdim etilmagan.
Joriy tartibga muvofiq, ikki oy muddatda foydalanilmayotgan obyektdan samarali foydalanish, shu jumladan, ishlab chiqarish yoki xizmat ko‘rsatish obyektini barpo etish, shuningdek, foydalanilmayotgan obyekt faoliyatini tiklashning aniq muddatlari va moliyalashtirish manbalarini nazarda tutadigan takliflarni taqdim etishlari shartligi belgilangan.
Constant Trading qo‘shma korxonasi o‘z faoliyatini yo‘lga qo‘yishda yana bir qonunbuzarlik holatiga yo‘l qo‘ygan. Farg‘ona viloyati ekologiya va atrof-muhitni muhofaza qilish boshqarmasining bizga ma’lum qilishicha, korxona davlat ekologik ekspertizasi xulosasini olmay turib faoliyat olib borgan. “Ekologik ekspertiza to‘g‘risida”gi qonunining 21 moddasiga muvofiq, davlat ekologik ekspertizasining xulosasi davlat ekologik ekspertizasi obyektini moliyalash va ro‘yobga chiqarishda yuridik va jismoniy shaxslar tomonidan ijro etilishi majburiydir. Davlat ekologik ekspertizasining ijobiy xulosasi bo‘lmay turib, loyihalarning bank va boshqa kredit tashkilotlari tomonidan moliyalanishi, shuningdek, ularning ro‘yobga chiqarilishi taqiqlanadi.
“Farg‘ona shahar hokimligining maqsadi tadbirkorning mulkini tortib olish emas, balki barcha korxona va tashkilotlarga birdek qo‘yiladigan talab – ularning to‘laqonli va samarali faoliyat olib borishi, davlat yerlaridan unumli foydalanishi va pirovardida aholi bandligini ta’minlashdan iborat. Korxonaning davlat oldida o‘z zimmasiga olgan majburiyatlarni, investitsiya kiritish shartlarini bajarmaslik, yangi ish o‘rinlari tashkil etmaslik amaldagi qonunchilik asosida tegishli qarorlar qabul qilishga asos bo‘ladi”, — deyiladi xabarda.