Жорий йилнинг 11 ноябрь куни Фарғона шаҳар ҳокимлиги матбуот хизмати «Олий судгача югуртирилган тадбиркорлар. Фарғона шаҳар ҳокимлиги нега мулкни тортиб олмоқчи бўлди?» сарлавҳаси остида мақолага муносабат билдиргани ҳақида хабар берилган эди.
« ‘Constant Trading’ қўшма корхонаси ўз фаолиятини йўлга қўйишда яна бир қонунбузарлик ҳолатига йўл қўйган. Фарғона вилояти экология ва атроф-муҳитни муҳофаза қилиш бошқармасининг бизга маълум қилишича, корхона давлат экологик экспертизаси хулосасини олмай туриб фаолият олиб борган. ‘Экологик экспертиза тўғрисида’ги қонунининг 21-моддасига мувофиқ, давлат экологик экспертизасининг хулосаси давлат экологик экспертизаси объектини молиялаш ва рўёбга чиқаришда юридик ва жисмоний шахслар томонидан ижро этилиши мажбурийдир. Давлат экологик экспертизасининг ижобий хулосаси бўлмай туриб, лойиҳаларнинг банк ва бошқа кредит ташкилотлари томонидан молияланиши, шунингдек, уларнинг рўёбга чиқарилиши тақиқланади»— дейилади Фарғона шаҳар ҳокимлиги муносабатида.
«Constant Trading» МЧЖ шаклидаги қўшма корхонаси «Дарё»га мурожаат қилиб, Фарғона шаҳар ҳокимлиги билдирган расмий баёнотда бир нечта текширилмаган фактлар мавжудлгини маълум қилди.
Хусусан, юқорида кўрсатилган ҳолатга «Constant Trading» қўшма корхонаси қуйидагича муносабат билдиради:
«Ҳозирги вақтда импорт қилиб олиб келинган асбоб-ускуналари монтаж қилиниши ҳамда ишга туширилишга тайёрланиши керак. Шундан сўнг қоидага кўра барча тегишли, хусусан экологик, норматив ва бошқа рухсатномалар олиш ҳаракатлари бошланади».
Ўзбекистон Республикаси Олий суди Маъмурий ишлар бўйича судлов ҳайъатининг (И.Алимов, Ш.Ахатова ва М.Эшимбетов) жорий йил 1 ноябрдаги ажрими билан «Constant Trading» МЧЖнинг назорат тартибидаги шикояти қаноатлантирилиб, Фарғона шаҳар маъмурий судининг 2019 йил 18 июлдаги ҳал қилув қарори ва вилоят маъмурий суди апелляция инстанциясининг 2019 йил 29 августдаги қарори бекор қилинди ва шаҳар ҳокимлигининг аризасини рад этиш тўғрисида янги қарор чиқарилди.
Бироқ Фарғона шаҳар ҳокимлиги ушбу масала юзасидан ўз нуқтаи назари қатъий эканлигини билдирган.
«Бу эса Фарғона вилояти мансабдор шахсларининг қонунга риоя қилишдан бош тортаётгани ва хорижий инвестиция улушига эга бўлган корхоналарнинг кўчмас мулкини ҳар қандай йўл билан эгаллаш мақсадидан далолат беради», — дейилади «Constant Trading» баёнотида.
Фарғона шаҳар ҳокимлиги муносабатида «Constant Trading» қўшма корхонаси томонидан 2018 йилдан 2019 йил ноябрь ойигача умуман маҳсулот экспортини амалга оширмагани айтилади. Ушбу ҳолатга «Constant Trading» қуйидагича изоҳ берган:
«Корхонамиз томонидан 2018 йилдан 2019 йил ноябрь ойигача умуман маҳсулот экспорт қилинмаганига келсак, реконструкция ва қурилиш-монтаж ишлари вақтида маҳсулот экспорти ҳақида ҳеч қандай гап бўлиши мумкин эмас. Биз бу даврда ишлаб чиқаришни қайта ихтисослаштириш билан фаол шуғулланиб келганмиз, бу эса тўсиқлар яратувчи Фарғона ҳокимлигига хуш келмади. 2019 йилнинг июль—октябрь ойларида корхонамиз инвестиция лойиҳаси бўйича технологик ускуналарни импорт қилди».
Изоҳ (0)