Eron tashqi ishlar vazirligi rasmiy vakili Abbos Musaviy Boliviyada amalga oshirilgan davlat to‘ntarishi va hukumatning noqonuniy ravishda tarqatilib yuborilganini keskin qoraladi. Bu haqda “Iran.ru” xabar berdi.
“Har qanday hukumatning qonuniy emas, balki zo‘ravonlik yo‘li bilan tashqi kuchlar vositasida almashtirilishi ijobiy holat emas”, — deydi Musaviy. U AQSh hukumatining Boliviya ichki ishlariga aralashuvini ham tanqid qildi.
Boliviyaning Tehrondagi elchisi Romina Gvadalupe Peres Ramos ham mamlakatdagi davlat to‘ntarilishini fashizm tuzumining o‘rnatilishiga qiyoslagan.
“Muxolifat o‘z maqsadi yo‘lida fashistlarga xos metodlardan foydalandi va zo‘ravonlik bilan hukumat tepasiga kelmoqda”, — deya qayd etgan elchi.
“Xorijdagi yovuz kuchlar Boliviyadagi norozilik namoyishlaridan foydalanib qolmoqchi bo‘ldi. Namoyishlarni bostirish uchun zo‘ravonlik qilingani tufayli Evo Morales va vitse-prezident boliviyaliklar xavfsizligi uchun iste’fo berdi. Konstitutsiyaga ko‘ra prezident ishdan ketsa, vitse-prezident, u ham lavozimini tark etsa Senat mas’uliyatni o‘z zimmasiga olishi lozim. Ammo muxolifat ushbu jarayonni o‘zgartirib, boshqa nomzodga boshqaruv vakolatlarini taqdim etmoqchi”, — deydi Boliviyaning Erondagi favqulodda va muxtor elchisi.
Evo Morales 10-noyabrda mudofaa vazirligi va muxolifatning bosimi sababli iste’foga chiqqanini e’lon qilgan. Morales Lotin Amerikasi mamlakatlari davlat rahbarlari orasida eng ko‘p prezidentlik qilgan siyosatchilardan biri edi va 20-oktabrda to‘rtinchi marta saylovlarda g‘olib chiqqandi.Muxolifat natijalarni inkor etdi va saylovchilar ovozlarini hisob-kitob qilishda hiyla-nayrang ishlatilganini gumon qildi. Natijada xalq norozilik namoyishlarini boshladi, ularda 3 nafar fuqaro halok bo‘ldi va yuzlab odamlar jarohatlandi.
Izoh (0)