Эрон ташқи ишлар вазирлиги расмий вакили Аббос Мусавий Боливияда амалга оширилган давлат тўнтариши ва ҳукуматнинг ноқонуний равишда тарқатилиб юборилганини кескин қоралади. Бу ҳақда «Iran.ru» хабар берди.
«Ҳар қандай ҳукуматнинг қонуний эмас, балки зўравонлик йўли билан ташқи кучлар воситасида алмаштирилиши ижобий ҳолат эмас», — дейди Мусавий. У АҚШ ҳукуматининг Боливия ички ишларига аралашувини ҳам танқид қилди.
Боливиянинг Теҳрондаги элчиси Ромина Гвадалупе Перес Рамос ҳам мамлакатдаги давлат тўнтарилишини фашизм тузумининг ўрнатилишига қиёслаган.
«Мухолифат ўз мақсади йўлида фашистларга хос методлардан фойдаланди ва зўравонлик билан ҳукумат тепасига келмоқда», — дея қайд этган элчи.
«Хориждаги ёвуз кучлар Боливиядаги норозилик намойишларидан фойдаланиб қолмоқчи бўлди. Намойишларни бостириш учун зўравонлик қилингани туфайли Эво Моралес ва вице-президент боливияликлар хавфсизлиги учун истеъфо берди. Конституцияга кўра президент ишдан кетса, вице-президент, у ҳам лавозимини тарк этса Сенат масъулиятни ўз зиммасига олиши лозим. Аммо мухолифат ушбу жараённи ўзгартириб, бошқа номзодга бошқарув ваколатларини тақдим этмоқчи», — дейди Боливиянинг Эрондаги фавқулодда ва мухтор элчиси.
Эво Моралес 10 ноябрда мудофаа вазирлиги ва мухолифатнинг босими сабабли истеъфога чиққанини эълон қилган. Моралес Лотин Америкаси мамлакатлари давлат раҳбарлари орасида энг кўп президентлик қилган сиёсатчилардан бири эди ва 20 октябрда тўртинчи марта сайловларда ғолиб чиққанди.Мухолифат натижаларни инкор этди ва сайловчилар овозларини ҳисоб-китоб қилишда ҳийла-найранг ишлатилганини гумон қилди. Натижада халқ норозилик намойишларини бошлади, уларда 3 нафар фуқаро ҳалок бўлди ва юзлаб одамлар жароҳатланди.
Изоҳ (0)