Plagiatda ayblangan Qozog‘iston maorif va ilm-fan vaziri o‘rinbosari lavozimidan ozod etildi

Fotima Jakipova Qozog‘iston maorif va ilm-fan vaziri o‘rinbosari lavozimidan ozod qilindi. Bu haqda “Interfaks” xabar berdi.

“Jakipova Fotima Nadirovna o‘z arizasiga ko‘ra hukumat qarori bilan Qozog‘iston respublikasi maorif va fan vaziri o‘rinbosari lavozimidan ozod qilindi”, — deyiladi Qozog‘iston bosh vazirining saytida berilgan axborot xizmati xabarida.

O‘tgan haftada senator Yedil Mamitbekov bosh vazirga so‘rov bilan murojaat qilgan, unda OAV plagiatda ayblayotgan Jakipovaning maorif va ilm-fan vaziri o‘rinbosari lavozimidan ozod qilinishini talab qilgandi.

Senator ta’lim sohasi jamiyatni ikki marta: dissertatsiyasini himoya qilayotganda va ommaviy axborot vositalaridagi chiqishlarda aldagan shaxs rahbarligiga muhtoj emasligini ta’kidlagan.

Murojaatdan keyin senat spikeri, Qozog‘istonning birinchi prezidenti Nursulton Nazarboyevning qizi Darig‘a Nazarboyeva ushbu masalani ko‘rib chiqishni tezlashtirishni talab qilgan.

“Ushbu masalaning ko‘rib chiqilishini tezlashtirish kerak. Vazirni senat oldida hisobotga taklif qiling, u o‘z jamoasi bilan ushbu muammolarga oydinlik kiritsin”, — degan Nazarboyeva.

Avval vazirlik xodimlaridan biri ijtimoiy tarmoqlarda vazir o‘rinbosari Fotima Jakipovaning dissertatsiyasi boshqa ilmiy ishlardan ko‘chirib yozilganini bildirgan. Jakipova bunga javoban ijtimoiy tarmoqqa milliy markazning davlat ilmiy-texnik ekspertiza xulosasini yuklagan va ‘Antiplagiat’ tizimi dissertatsiyaning markaz ma’lumotlar bazasidagi hech bir ilmiy ish bilan o‘xshash emasligini ma’lum qilgan.

Keyinroq “Vremya” gazetasi xorijning StrikePlagiarism tahlil tizimi vazirning ilmiy ishida plagiat belgilari borligi aniqlangani haqida yozgan.