O‘zbekistonda gektaridan 100 tonna, yiliga ikki marta hosil beradigan uzum navi hamda har biri bir kilogramm va undan ortiq tosh bosadigan olmalar yetishtirilishi mumkin, deb yozmoqda O‘zA.
Qayd etilishicha, kuni kecha O‘zbekiston fermer, dehqon xo‘jaliklari va tomorqa yer egalari kengashidan bir guruh vakillar Xitoyning Shandun provinsiyasida bo‘lib, ekinlar yetishtirishning eng ilg‘or usullari bilan tanishib qaytdi.
“Anjirzorda juda qiziqarli ma’lumotlarga ega bo‘ldik. Har sotix yerda 50 dona ko‘chat ekilib, 500 kilogramm hosil olinar ekan. Bizni hayratga solgani, ular har tup anjirdan uzog‘i bilan sakkiz oy foydalanar ekan. Har bir ko‘chat yanvardan iyungacha qayta-qayta gullab hosil beraverar ekan. So‘ngra uni shoxlari kesiladi va tupidan o‘sib chiqqan yangi shoxlar 200 kundan keyin yana hosilga kiradi, — degan O‘zbekiston Fermer, dehqon xo‘jaliklari va tomorqa yer egalari kengashi qoshidagi qishloq va biznes uchun maslahat markazi direktor o‘rinbosari Xurshid Boltayev.
Shuningdek, O‘zbekistonda ham, bu amaliyotga tatbiq etilsa, mahalliy va xorijiy bozorni bemalol egallay olishini, daromad ko‘payishini ta’kidlagan. O‘zbekistondan borgan bir guruh qishloq xo‘jaligi xodimlari ana shu ilg‘or tajribalarni o‘rganish va amaliyotga joriy etishda o‘z hissasini qo‘shish niyatida.Delegatsiya vakillari Xitoyda quyosh nuri bilan isitiladigan issiqxonalarni qurish, ularni yuritish va samaradorligini o‘rganish bilan bir qatorda ko‘chat yetishtirish borasida ham yangi tajribalar o‘rgangan.
Izoh (0)