O‘zbekiston Respublikasi Adliya vazirligi huzuridagi X.Sulaymonova nomidagi Respublika sud ekspertizasi markazida Prezidentning joriy yil 17-yanvardagi “Sud-ekspertlik faoliyatini yanada takomillashtirish chora-tadbirlari to‘g‘risida”gi qarori ijrosi doirasida amalga oshirilgan ishlarga bag‘ishlangan matbuot anjumani bo‘lib o‘tdi. Bu haqda O‘zA xabar berdi.
Qarorga muvofiq amaliyotda ilk bor nodavlat tashkilotlar tomonidan sud-ekspertlik faoliyatini amalga oshirishning huquqiy asoslari yaratildi.
Xususan, nodavlat sud-ekspertiza tashkilotlariga sud ekspertizalarining 44 turini o‘tkazish huquqi berildi. Ularni qayta tayyorlash va malaka oshirish tizimini tashkil qilish hamda sud eksperti sertifikatini olgan shaxslarning Yagona ro‘yxatini va nodavlat sud-ekspertiza tashkilotlari reytingini yuritish belgilandi.
Shuningdek, qaror bilan 2019—2020-yillarda sud ekspertlik faoliyatini yanada takomillashtirish bo‘yicha 25 banddan iborat “Yo‘l xaritasi” tasdiqlandi va unga asosan sud-ekspertiza xizmatlari faoliyatining normativ-huquqiy bazasini takomillashtirish, amaliyotga yangi innovatsion ishlanmalarni joriy etish, sud ekspertizalarining turlarini kengaytirish, ularning sifati va ishonchliligini oshirish rejalashtirilgan.
Shuningdek, markazning moddiy-texnik bazasini mustahkamlash, sud-ekspertlik faoliyatiga axborot-kommunikatsiya texnologiyalarini joriy qilish hamda ixtisoslashtirilgan nodavlat sud ekspertiza tashkilotlarini rivojlantirish yo‘nalishlari belgilangan.
Qayd etilishicha, markaz xodimlarning ijtimoiy muhofazasi, moddiy ta’minoti tubdan yaxshilandi va hukumat qaroriga asosan moddiy-texnik bazani modernizatsiya qilish va zamonaviy uskunalar bilan jihozlash uchun 3,326 million dollar miqdorida mablag‘ ajratildi. Markaz tuzilmasiga bugungi kun talablaridan kelib chiqqan xolda o‘zgartishlar kiritilib, bir qator yangi bo‘limlar tashkil etildi va xodimlar shtat birligi sezilarli darajada oshirildi.
Qayd etib o‘tilgan yo‘nalishning amaliy natijasi sifatida Markazning yangi ixtisoslashgan binosi qurilib, foydalanishga topshirildi.
Qayd etilishicha, huquqni muhofaza qiluvchi organlar va sudlarning malakali sud ekspertiza xulosalariga bo‘lgan ehtiyojlarini, shuningdek, ilg‘or xorijiy tajribani hisobga olgan holda sud ekspertizaning yangi turlari joriy qilish bo‘yicha ilmiy-tadqiqot ishlari olib borilmoqda.
Mazkur ilmiy ishlar sud-psixologik ekspertizasi, sud-elektrotexnika ekspertizasi, oziq-ovqat mahsulotlarining sud ekspertizasi, sud lingvistik ekspertizasi, sud avtomobil yo‘llari ekspertizasi va sud kompyuter-texnik ekspertizalari yo‘nalishlarida O‘zbekiston Fanlar akademiyasining ilmiy-tadqiqot muassasalari va oliy ta’lim muassasalari bilan hamkorlikda 21 dan ortiq tasdiqlangan mavzuda lib borilmoqda.
Tadbir davomida markazning yangi ixtisoslashtirilgan binosida media-tur tashkil etilib, ishtirokchilarning sud-ekspertiza faoliyatiga oid barcha savollariga davlat sud ekspertlari tomonidan javob berildi.
Izoh (0)