“Lukoyl” kompaniyasi bosh energetik lavozimida ishlaydigan Ivan Shilov Qashqadaryo viloyati Dehqonobod tumanidagi Jarquduq gaz tayyorlash majmuasi ishchilarini haqorat qilgani aks etgan video yuzasidan rasmiy bayonot berdi.
Komapniya matbuot xizmatining xabariga ko‘ra, voqea 29-oktabr kuni Qashqadaryo viloyati, Dehqonobod tuman, Jarquduq gaz tayyorlash majmuasida yuz bergan.
“Aniqlanishicha, elektrchilangarlar brigadasi uchastka boshlig‘i rahbarligida 110 kV kuchlanishli Jarquduq podstansiyasida ish olib borgan vaqtda texnika xavfsizligi talablari qo‘pol ravishda buzilgan bo‘lib, bu brigada o‘limi, qimmatbaho uskunalarning shikastlanishi va butun obyektning ishdan chiqishiga olib kelishi mumkin bo‘lgan”, — deyiladi kompaniya xabarida.
Yo‘l qo‘yilgan xatolik bosh energetik lavozimida ishlaydigan Ivan Shilov tomonidan aniqlangan, shundan so‘ng yo‘l qo‘yilgan xatolik bartaraf etilgunga qadar podstansiyadagi ishlar to‘xtatilgan.
“Belgilangan ko‘rsatmalarga rioya qilmaslik qo‘l ostidagi xodimlarning hayoti uchun fojiali oqibatlarga olib kelishi mumkinligini anglagan Ivan Shilov muloqot chog‘ida axloqiy me’yorlardan chetga chiqqan va xodimga nisbatan qo‘pol so‘zlar bildirgan”, — deyiladi xabarda.
Qayd etilishicha, hozirda kompaniya ichki tekshiruv o‘tkazmoqda, shu sababli Ivan Shilov “Lukoyl”ning Ishbilarmonlik etikasi bo‘yicha komissiyasining Moskvadagi yig‘ilishiga chaqirilgan.
“O‘rganish natijalariga ko‘ra voqeaning barcha ishtirokchilariga nisbatan aybdorlik darajasini hisobga olgan holda intizomiy choralar ko‘riladi”, — deb ta‘kidlangan kompaniya xabarida.
Videolavhaga nisbatan ijtimoiy tarmoqlarda turli munosabatlar ko‘paymoqda. Haqoratlarga kerakli chora ko‘rish borasida “Adolat”, XDP, O‘zLiDeP hamda “Yuksalish” umummilliy harakati tomonidan ham munosabat bildirildi.
Izoh (0)