2018-yil davomida Surxondaryoga Afg‘onistondan 700—800 kishi kelgan bo‘lsa, joriy yilda ularning soni to‘rt mingdan ortib ketdi, deb xabar beradi O‘zA.
Surxondaryo sayyohlik borasida boy tajribaga ega Samarqand, Buxoro, Xiva kabi shaharlar safiga qo‘shilmoqda. Viloyatda ko‘plab tarixiy obidalar mavjud bo‘lib, ular endi ta’mirlanib, sayyohlar e’tiboriga havola etilmoqda. Hakim at-Termiziy, Iso at-Termiziy, Sulton ota, Qirq qiz kabilardan tashqari buddizm bilan bog‘liq o‘ndan ziyod obidalar mavjud. Denov, Termiz, Sho‘rchi va Muzrobod tumanlarida ular ko‘proq uchraydi.
Ta’kidlanishicha, Fayoztepa, Kampirtepa, Dalvarzintepa, Qoratepa kabilarni ko‘rish uchun Yaponiya, Xitoy va Malayziyadan har yili juda ko‘p odamlar kelmoqda.
“Bizda turizmni boshqa turlari qatori tanishtiruv turizmi ham rivojlanmoqda. Bu yo‘nalishda AQSh, Germaniya, Fransiyadan ko‘p kelishadi. Eng ko‘pi esa Afg‘onistondan keladi. Ularga viza berib ulgurmaymiz. Chunki yurtimiz ko‘pgina davlatlar uchun ochiq bo‘lgani bois Afg‘onistondan kelish ham juda oson. O‘tgan yili 700—800 kishi kelgan bo‘lsa, bu yil to‘rt mingdan ortiq qabul qilindi. Afg‘onlarga, eng avvalo, yurtimizdagi tinchlik, osoyishtalik qiziq. Ular xotirjamlik izlab keladi. Mehmonxonalarga joylashib, tarixiy obidalarni ko‘radi va bog‘larda sayr qilib besh, o‘n kun qolib ketadi”, — deydi Surxondaryo viloyati Turizm boshqarmasi vakili Shuhrat Ibrohimov.
Eslatib o‘tamiz, Toshkent viloyatiga joriy yilning to‘qqiz oyi davomida uch milliondan ortiq turist tashrif buyurgan.
Izoh (0)