«Лукойл» компанияси бош энергетик лавозимида ишлайдиган Иван Шилов Қашқадарё вилояти Деҳқонобод туманидаги Жарқудуқ газ тайёрлаш мажмуаси ишчиларини ҳақорат қилгани акс этган видео юзасидан расмий баёнот берди.
Комапния матбуот хизматининг хабарига кўра, воқеа 29 октябрь куни Қашқадарё вилояти, Деҳқонобод туман, Жарқудуқ газ тайёрлаш мажмуасида юз берган.
«Аниқланишича, электрчилангарлар бригадаси участка бошлиғи раҳбарлигида 110 кВ кучланишли Жарқудуқ подстанциясида иш олиб борган вақтда техника хавфсизлиги талаблари қўпол равишда бузилган бўлиб, бу бригада ўлими, қимматбаҳо ускуналарнинг шикастланиши ва бутун объектнинг ишдан чиқишига олиб келиши мумкин бўлган», — дейилади компания хабарида.
Йўл қўйилган хатолик бош энергетик лавозимида ишлайдиган Иван Шилов томонидан аниқланган, шундан сўнг йўл қўйилган хатолик бартараф этилгунга қадар подстанциядаги ишлар тўхтатилган.
«Белгиланган кўрсатмаларга риоя қилмаслик қўл остидаги ходимларнинг ҳаёти учун фожиали оқибатларга олиб келиши мумкинлигини англаган Иван Шилов мулоқот чоғида ахлоқий меъёрлардан четга чиққан ва ходимга нисбатан қўпол сўзлар билдирган», — дейилади хабарда.
Қайд этилишича, ҳозирда компания ички текширув ўтказмоқда, шу сабабли Иван Шилов «Лукойл»нинг Ишбилармонлик этикаси бўйича комиссиясининг Москвадаги йиғилишига чақирилган.
«Ўрганиш натижаларига кўра воқеанинг барча иштирокчиларига нисбатан айбдорлик даражасини ҳисобга олган ҳолда интизомий чоралар кўрилади», — деб таъкидланган компания хабарида.
Видеолавҳага нисбатан ижтимоий тармоқларда турли муносабатлар кўпаймоқда. Ҳақоратларга керакли чора кўриш борасида «Адолат», ХДП, ЎзЛиДеП ҳамда «Юксалиш» умуммиллий ҳаракати томонидан ҳам муносабат билдирилди.
Изоҳ (0)