Janubiy Koreyaga tegishli Erae CS Co kompaniyasining Rossiyadagi sho‘basi avtomobillar distribyutori — “UzDEUavto-Voronej” kompaniyasining bankrotligi bo‘yicha ishda qarzdorni nazorat qiluvchilarni, xususan, “O‘zavtosanoat”ni javobgarlikka tortishni talab qilmoqda. Bu haqda “Praym” Voronej viloyati hakamlik sudi materiallariga asoslanib xabar berdi.
Hozirgi vaqtda subsidiar javobgarlik hajmi 22 milliard rublga baholanmoqda. Koreya kompaniyasining sho‘basi oldidagi qarz 2015-yil 3-dekabrdagi dilerlik shartnomasi bo‘yicha paydo bo‘lgan, unga ko‘ra u distribyutorga 10 million dollar o‘tkazgan, ammo hech qanday mashina olmagan.
Talablar “O‘zavtosanoat”, Avtosanoat Invest, GM Uzbekistan AJ, shuningdek, 2013-yildan 2017-yilgacha qarzdorning bosh direktori lavozimini egallagan uch shaxs — Yuriy Kan, Xasanbek Muzaffarov, Igor Davidovga qo‘yilmoqda. Boshqa kreditorlar ham ularni subsidiar javobgarlikka tortish to‘g‘risida ariza berdi.
2017-yil aprel oyida Voronej viloyati arbitraj sudi “UzDEUavto-Voronej”ni bankrot deb topdi. GM Uzbekistan tomonidan ishlab chiqarilgan Daewoo va Ravon avtomobillarini Rossiyaga ulgurji yetkazib berish bilan shug‘ullangan ushbu kompaniyaning yagona aksiyadori — “O‘zavtosanoat”ga tegishli bo‘lgan Avtosanoat Invest.
Kreditorlarning, shu jumladan, Erae CS Co sho‘basining fikriga ko‘ra, qarzdor bilan bir guruhga kiruvchi javobgarlarning xatti-harakatlari avvaliga “UzDEUavto—Voronej”ning bankrotligiga olib kelgan, keyin esa bankrotlik to‘g‘risidagi ishda mustaqil kreditorlarning manfaatlariga zarar yetkazuvchi “do‘stona” qarzdorlikka olib keldi. Shu tariqa, “UzDEUavto—Voronej” reyestriga kiritilgan GM Uzbekistan oldidagi qarz 9,5 milliard rubldan oshadi (reyestrning qariyb 40 foizi).
Voronej sudi qarzdorni nazorat qiluvchi shaxslarni subsidiar javobgarlikka tortish to‘g‘risidagi arizani ko‘rib chiqishni 2020-yil 13-aprelga tayinladi.
2008-yil mart oyida General Motors (o‘shanda 25 foiz ulushda) va “O‘zavtosanoat” (o‘shanda — 75 foiz) “UzDEUavto” bazasida GM Uzbekistan qo‘shma korxonasini tashkil etish jarayonini yakunladi. 2017-yil oktabr oyida GM Uzbekistan QK aksiyadorlari tarkibidan bosqichma-bosqich chiqish haqida qaror qabul qildi. 2018-yil dekabr oyida davlat kompaniyasi qo‘shma korxonadagi GM ulushini to‘liq sotib oldi, keyinchalik nom UzAuto Motors’ga o‘zgartirildi.
Izoh (0)