2019-yil 13-noyabr kuni taxminan soat 15:30 da Guliston davlat universiteti Filologiya fakultetining “O‘zbek tili va adabiyoti” yo‘nalishi 4-bosqich 49-16-guruh talabasi Yu.Qarshiboyev universitet bosh binosining 3-qavati oynasidan telefon orqali suhbatlashayotgan vaqtida ehtiyotsizligi sababli pastga tushib ketgan. Bu haqda Oliy va o‘rta-maxsus ta’lim vazirigi xabar berdi.
Xabar berilishicha, voqea sodir bo‘lgandan keyin tez tibbiy yordamga murojaat qilingan, shifokorlar tomonidan talabaga yordam ko‘rsatilgan. Shundan so‘ng talaba Respublika shoshilinch tez tibbiy yordam markazi Sirdaryo viloyati bo‘limiga olib borilgan va to‘liq tibbiy ko‘rikdan o‘tkazilgan.
Ushbu voqea yuzasidan “O‘zbek tili va adabiyoti” yo‘nalishi, 4-bosqich 49-16-guruh talabalari bilan universitet ma’muriyati tomonidan suhbat o‘tkazilganida, guruh talabalari o‘rtasida hech qanday nizoli holat bo‘lmagani, Yu.Qarshiboyevning hech kim bilan tortishmagani ma’lum bo‘lgan.
Ma’lum qilinishicha, 14-noyabr kuni viloyat shifoxonasida Yu.Qarshiboyev muvaffaqiyatli operatsiya qilingan, hozirda uning umumiy ahvoli yaxshi. Universitet ma’muriyati va kursdoshlari Yu.Qarshiboyev ahvolidan xabar olib turibdi.
Joriy yilning mart oyida Islom Karimov nomidagi Toshkent davlat texnika universitetida tahsil oluvchi qiz yotoqxonaning oltinchi qavatidan tushib ketib vafot etgan edi. Shuningdek, 2019-yilning may oyida Andijon shahridagi 14-umumta’lim maktabining 7-sinf o‘quvchisi maktab binosining 2-qavatidan, sentabr oyida esa Izboskan tumanidagi 39-davlat ixtisoslashtirilgan maktab-internatining 11-sinf o‘quvchisi maktab binosining 3-qavatidan pastga tushib ketgan edi.
Izoh (0)