14-noyabr kuni Toshkent shahrida Markaziy Osiyo mintaqaviy iqtisodiy hamkorlik (MOMIH) dasturining 18-vazirlar konferensiyasining ochilishi bo‘lib o‘tdi. Bu haqda Investitsiyalar va tashqi savdo vazirligi matbuot xizmati “Daryo”ga xabar berdi.
Marosimning tantanali ochilishida O‘zbekiston Hukumati a’zolari, Osiyo taraqqiyot banki (OTB) prezidenti Takehiko Nakao, iqtisodiyot, investitsiyalar va savdo sohalarida 11 mamlakatning yuqori martabali vakillari,xalqaro moliya institutlari, xalqaro hamkorlik tashkilotlari vakillari va diplomatik vakolatxonalar rahbarlari ishtirok etdi.
Konferensiya mavzusi “Yangi MIMIH – mintaqaviy hamkorlik doirasini kengaytirish”.
Ushbu tadbir konferensiya ishtirokchilariga O‘zbekiston Prezidentining tabrik murojaatini yetkazish bilan ochildi. Murojaatda Osiyo taraqqiyot banki rahbariyatiga va barcha ishtirokchilarga tadbirni tashkil etishdagi birgalikda xarakatlar uchun alohida minnatdorchilik bildirilib, kun tartibiga kiritilgan masalalarni muhokama qilish va kelishish ishlarida samarali faoliyat tilab o‘tildi.
OTB Prezidenti Takehiko Nakao MOMIH Dasturi konferensiyasi tashkilotchisi va tashabbuskori nomidan qilgan chiqishida O‘zbekiston tomonidan tadbirni yuqori darajada tashkil qilinganini ta’kidlab o‘tib, O‘zbekiston Prezidenti va Hukumatiga o‘z minnatdorchiligini bildirdi.
Shuningdek, u o‘z ma’ruzasida Osiyo taraqqiyot bankining mintaqadagi strategik hamkorlari qatorida bo‘lgan O‘zbekistonning iqtisodiy o‘zgarish jarayonlariga yuqori baho berib, amalga oshirilayotgan islohotlar natijasida mamlakatda yuzaga kelgan qulay sharoit doirasida ikki tomonlama o‘zaro munosabatlarni yanada kengaytirilishiga umid bildirdi.
“Biz, O‘zbekiston va MOMIH ishtirokchi davlatlarning iqtisodiy farovonlik davriga o‘tish bilan bog‘liq bo‘lgan, o‘zaro ishonch va hamkorlikni mastahkamlashga tarafdorlik tamoyillari asosida shakllanayotgan birgalikdagi harakatlarni olqishlaymiz”, — deb ta’kidladi Takehiko Nakao.
Konferensiyaga raislik qiluvchi – O‘zbekiston Investitsiyalar va tashqi savdo vaziri Sardor Umurzoqov MOMIH Dasturining mintaqaviy tashabbuslarni amalga oshirish bilan bog‘liq dolzarb masalalarni har tomonloma muhokama qilish hamda investitsiya, energetika, transport va savdo sohalarida o‘zaro munosabatlarni rivojlantirish va mustahkamlash uchun a’zo mamlakatlarning birgalikdagi harakatlar strategiyasini shakllantirish uchun platformasi sifatida muhim rolini ta’kidlab o‘tdi.
Shuningdek press-konferensiya davomida a’zo mamlakatlar va xalqaro hamkorlar tomonidan MOMIH Dasturi chora-tadbirlarini amalga oshirishda erishilgan natijalar, shu jumladan energetika va transport sohasida ishlab chiqilgan strategiyalarni ko‘rib chiqishga bag‘ishlangan panel sessiyalari o‘tkaziladi hamda barqaror rivojlanishning qator ustuvor yo‘nalishlari bo‘yicha mintaqaviy hamkorlikning dolzarb masalalari muhokama qilinadi.
Izoh (0)