“O‘zbekkino” milliy agentligining buyurtmasiga binonan, jadidchilik harakatining namoyandalaridan biri Abdulla Avloniy tavalludining 140-yilligi munosabati bilan “Avloniy” to‘liq metrajli filmini suratga oldi, deya xabar berdi O‘zA.
Film voqealariga Tohir Malikning “Qaldirg‘och” asari motivi asos qilib olingan.
Kartinada Abdulla Avloniyning 1919-yilda Afg‘onistonga qilgan diplomatik safari haqida hikoya qilinadi.
Kinoasarda Abdulla Avloniy roli Xorazm teatri aktyori Alisher Yo‘ldoshevga ishonib topshirildi va yana mahoratli aktyorlardan Matyoqub Matchonov, Muhammadali Abduqunduzov, Abror Yo‘ldoshev, Javohir Zokirovlar filmning professional chiqishiga yordam berishdi.
Filmni suratga olish ishlari aprel oyida boshlanib, avgust oyida nihoyasiga yetdi. Syomka jarayonlari Xorazm, Qoraqalpog‘iston Qo‘qon hududlarida bo‘lib o‘tdi. Ijodiy guruh katta mas’uliyatni his qilib, keng qamrovda ishlashdi.
Xususan, 20 dan ziyod dekoratsiya: jumladan, 3 ta vokzal, 2 ta 14 metrli poyezd, bitta paraxod qurildi, 500 dan ziyod kostyum tikildi.
Film ijodkorlarining asosiy maqsadi Abdulla Avloniy obrazi timsolida o‘sha davrda yashab, faoliyat yuritgan, millat va yurt uchun kurashgan ziyolilarning hayotini ko‘rsatish va bu orqali bugungi kun yoshlarida millatga bo‘lgan muhabbat, ajdodlarga nisbatan faxr va g‘urur tuyg‘ularini shakllantirishdan iborat.Filmning premyerasi 6-dekabrda bo‘lishi kutilmoqda.Muzaffar Erkinov, film rejissori
Abdulla Avloniy – 1874-yilda Mergancha mahallasida to‘quvchi Miravlon aka oilasida tavallud topgan. Shoir, dramaturg, murabbiy, ilk darsliklar muallifi, o‘zbek teatrining asoschilaridan biri, “Turon“ teatr truppasi tuzuvchisi, Turkistonning Afg‘onistondagi birinchi muxtor elchisi va mamlakat rivoji uchun ulkan hissa qo‘shgan siyosat arbobi hisoblanadi.
Izoh (0)