Bu haqda joriy yilning 2-noyabr kuni Toshkent shahridagi Xalqaro hamkorlik markazida bo‘lib o‘tgan O‘zbekiston “Adolat” sotsial-demokratik partiyasining IX Qurultoyida ma’lum qilindi.
Qurultoyda O‘zbekiston “Adolat” SDP Siyosiy Kengashi raisi N.Umarovning “O‘zbekiston “Adolat” sotsial-demokratik partiyasi Siyosiy Kengashining faoliyati hisoboti va yangi bosqichda partiya vazifalari to‘g‘risida”gi ma’ruzasi tinglandi. Ma’ruzada hisobot davrida partiya dasturidagi ustuvor yo‘nalishlarning bajarilishi tahlil etildi. Partiyaning mafkuraviy, tashkiliy-kadrlar sohasidagi faoliyati natijalari sarhisob qilindi. Shuningdek, partiya faoliyatining qator yo‘nalishlari tanqidiy tahlil etildi. Xalq deputatlari mahalliy Kengashlaridagi deputatlik guruhlari ishidagi mavjud kamchiliklar qayd qilinib, ularni bartaraf etish yo‘llari ko‘rsatib o‘tildi.
O‘zbekiston “Adolat” sotsial-demokratik partiyasi bugungi kunda 414 478 ming a’zoga, mamlakatning barcha hududlarida 6313 ta boshlang‘ich partiya tashkilotiga, 201 ta hududiy bo‘linmaga, parlament va hokimiyatning mahalliy vakillik organlarida deputatlik guruhlariga ega bo‘lgan yirik siyosiy kuchga aylandi.
Tashkiliy-partiyaviy ishlar darajasini muntazam oshirib borish bilan bir qatorda partiyaning “Adolat – hayotimizning bosh mezoni” g‘oyasi bilan belgilangan Saylovoldi dasturini amaliyotga qo‘llash hamda ijrosini ta’minlash maqsadida o‘tgan davr oralig‘ida 27 ta turli sohalar bo‘yicha xalqchil va o‘ta muhim partiya loyihalari ishlab chiqildi. Ular xalqimiz farovonligi yo‘lida amaliyotga tatbiq etildi. “Adolat – qonun ustuvorligida”, “Siyosiy-huquqiy bilimlarni mustahkamlash – demokratik jamiyat poydevori”, “Farzandlari sog‘lom yurt – qudratli bo‘lur” va boshqa ko‘plab loyihalar jamoatchilik nazorati bilan muvofiqlashtirildi.
Akmal Burxanov – Oliy Majlis Qonunchilik palatasidagi “Adolat” SDP fraksiyasi a’zosi
- “Adolat” SDP tomonidan ilgari surilgan loyihalar jamiyatimizni har bir jabhasidagi kamchilik va muammolarni qamrab olib, hisobot davrida partiya sa’yi-harakati evaziga quruq gaplar bilan emas, aksincha ta’sirchan tadbirlarning keng omma kayfiyatiga, fuqarolar manfaatlaridan chiqqan holda maqsad va vazifalariga qaratilganligi namoyon bo‘lmoqda. Ushbu jarayonda joylardagi deputatlar korpusi faollik ko‘rsatib, o‘tgan hisobot davrida ular tomonidan doimiy komissiyalarga kiritilgan masalalar jami 428 ta, sessiyalarga kiritilgan masalalar jami 233 ta, mansabdor shaxs hisobotlari jami 470 ta va deputatlik so‘rovi 4214 tani tashkil qildi.
Hisobot davrida fraksiya a’zolari 43 ta qonun loyihasiga tashabbuskor bo‘ldilar. Shundan 9 tasi yaxlit qonunlar bo‘lsa, 34 tasi mavjud qonunlarga o‘zgartish va qo‘shimchalar kiritishdan iborat bo‘ldi.
Xususan, “Parlament nazorati to‘g‘risida”gi, “O‘zbekiston Respublikasi Davlat xavfsizlik xizmati to‘g‘risida”gi, “Toshkent shahar xalq deputatlari tuman Kengashlariga saylov to‘g‘risida”gi, “Fuqarolarning reproduktiv salomatligini muhofaza qilish to‘g‘risida”gi, “Saylov kodeksini tasdiqlash to‘g‘risida”gi, “Konstitutsiyaviy sud to‘g‘risida”gi, “Qayta tiklanuvchi energiya manbalari to‘g‘risida”gi, “Yaylovlar to‘g‘risida”gi, “Kasaba uyushmalari to‘g‘risida”gi yaxlit Qonunlar qabul qilinishga erishildi.
Qayd etilganidek, O‘zbekiston “Adolat” sotsial-demokratik partiyasining “Adolat – har bir inson uchun” nomli saylovoldi dasturi loyihasini har tomonlama pishiq va puxta bo‘lishiga katta e’tibor qaratildi. Eng asosiysi, dastur partiya a’zolari, boshlang‘ich partiya tashkilotlari, deputatlik korpusi, faollar, ekspertlar va oddiy fuqarolarimiz fikri asosida takomiliga yetkazildi. Yangi dasturda asosiy e’tibor sud-huquq, sog‘liqni saqlash, ta’lim va ilm-fan sohalari hamda tashqi va ichki siyosatga qaratildi.
Jumladan, “Sog‘liqni saqlash sohasida zamonaviy axborot-kommunikatsiya texnologiyalarini joriy etish, “Aqlli tibbiyot” tizimini shakllantirish, joylarda aholiga malakali tibbiy yordam ko‘rsatish, dori-darmonlarning noqonuniy aylanishi ustidan partiyaning qat’iy pozitsiyani bildirish, ta’sirchan qonunchilik mexanizmlarini ishlab chiqish belgilandi.
Alisher Shodmonov, Sog‘liqni saqlash vaziri, “Adolat” SDP Siyosiy Kengashi a’zosi
- Bugungi kunda tibbiyot sohasida ulkan islohotlar amalga oshirilmoqda. Mana shu islohotlarda partiyamizni bevosita partiyamizdan saylangan deputatlarning ham alohida o‘rni bor. Chunki birinchi navbatda islohotni amalga oshirishda huquqiy tartib o‘rnatish, hujjatlarni takomillashtirish zarur. Bu borada “Fuqarolarning reproduktiv salomatligini saqlash to‘g‘risida”gi, “Ona suti bilan oziqlantirishni qo‘llab-quvvatlash hamda go‘daklar va kichik yoshdagi bolalar oziq-ovqat mahsulotlariga doir talablar to‘g‘risida” gi qonuni loyihalari bo‘yicha ham bevosita bizning partiya ish olib bordi. Ayni kunlarda esa “Adolat” SDP fraksiyasi a’zoliri ishtirokida “Inson organlari, to‘qimalari va (yoki) hujayralarini transplantatsiya qilish haqida”gi qonun loyihasi ustida ustida ish olib borishmoqda.
Sud-huquq sohasida tergov organlarining yagona tizimini yaratish, turli yo‘nalishlarga bo‘lingan sudlarni umumlashtirish, advokatura instituti mustaqilligini ta’minlash, aholining huquqiy madaniyat va bilimlarni oshirish, korrupsiyaga qarshi kurashishga fuqarolarni keng jalb qilish vazifalari rejalashtirilgan.
Shu bilan birga, partiya a’zolarining 25 foizi mehnat qilayotgan ta’lim tizimda — umumiy ta’lim sohasida sifatni keskin oshirish, oliy ta’limda qabul kvotalaridan voz kechish, ilm-fanning iqtisodiyotda rolini kuchaytirish belgilangan.
Bundan tashqari partiya “propiskadan o‘tish” tizimiga yangicha yondashish, fuqarolarimizning o‘z xohish-istaklaridan kelib chiqib, doimiy yashash joyini o‘zi belgilash huquqini ta’minlovchi qonuniy bazani takomillashtirish choralarini ko‘rmoqda.
Dasturda ommaviy axborot vositalari vakillari qatori blogerlik faoliyatini ham tegishli qonunlarda huquqiy asoslarini shakllantirish ko‘zda tutilgan.
Qurultoyda so‘z olganlarning ma’ruza va chiqishlarida asosiy e’tibor partiyaning qonunchilik va vakillik organlariga bo‘lib o‘tadigan saylovlarga tayyorgarligi, barcha darajadagi saylov shtablari faoliyati samaradorligi, elektorat bilan samarali ishlash masalalariga qaratildi.
Qurultoyda O‘zbekiston Respublikasining Saylov kodeksining 70-moddasiga muvofiq O‘zbekiston Respublikasi Oliy Majlisi Qonunchilik palatasi deputatligiga ko‘rsatilgan nomzodlar ma’qullandi. Qurultoyda, shuningdek, partiyaning oliy organi vakolatiga kiruvchi boshqa masalalar ham ko‘rib chiqildi. Siyosiy Kengash va Markaziy Taftish komissiyasining yangi a’zolari saylandi. Partiya Ustavi qabul qilindi. Qurultoyda ko‘rib chiqilgan masalalar yuzasidan tegishli qarorlar qabul qilindi.
Qurultoy ishining yakunlari bo‘yicha mahalliy va xorijiy ommaviy axborot vositalari xodimlari uchun brifing o‘tkazildi.
Reklama huquqi asosida.
Izoh (0)