Бу ҳақда жорий йилнинг 2 ноябрь куни Тошкент шаҳридаги Халқаро ҳамкорлик марказида бўлиб ўтган Ўзбекистон «Адолат» социал-демократик партиясининг IX Қурултойида маълум қилинди.
Қурултойда Ўзбекистон «Адолат» СДП Сиёсий Кенгаши раиси Н.Умаровнинг «Ўзбекистон «Адолат» социал-демократик партияси Сиёсий Кенгашининг фаолияти ҳисоботи ва янги босқичда партия вазифалари тўғрисида»ги маърузаси тингланди. Маърузада ҳисобот даврида партия дастуридаги устувор йўналишларнинг бажарилиши таҳлил этилди. Партиянинг мафкуравий, ташкилий-кадрлар соҳасидаги фаолияти натижалари сарҳисоб қилинди. Шунингдек, партия фаолиятининг қатор йўналишлари танқидий таҳлил этилди. Халқ депутатлари маҳаллий Кенгашларидаги депутатлик гуруҳлари ишидаги мавжуд камчиликлар қайд қилиниб, уларни бартараф этиш йўллари кўрсатиб ўтилди.
Ўзбекистон «Адолат» социал-демократик партияси бугунги кунда 414 478 минг аъзога, мамлакатнинг барча ҳудудларида 6313 та бошланғич партия ташкилотига, 201 та ҳудудий бўлинмага, парламент ва ҳокимиятнинг маҳаллий вакиллик органларида депутатлик гуруҳларига эга бўлган йирик сиёсий кучга айланди.
Ташкилий-партиявий ишлар даражасини мунтазам ошириб бориш билан бир қаторда партиянинг «Адолат – ҳаётимизнинг бош мезони» ғояси билан белгиланган Сайловолди дастурини амалиётга қўллаш ҳамда ижросини таъминлаш мақсадида ўтган давр оралиғида 27 та турли соҳалар бўйича халқчил ва ўта муҳим партия лойиҳалари ишлаб чиқилди. Улар халқимиз фаровонлиги йўлида амалиётга татбиқ этилди. «Адолат – қонун устуворлигида», «Сиёсий-ҳуқуқий билимларни мустаҳкамлаш – демократик жамият пойдевори», «Фарзандлари соғлом юрт – қудратли бўлур» ва бошқа кўплаб лойиҳалар жамоатчилик назорати билан мувофиқлаштирилди.
Акмал Бурханов – Олий Мажлис Қонунчилик палатасидаги «Адолат» СДП фракцияси аъзоси
- «Адолат» СДП томонидан илгари сурилган лойиҳалар жамиятимизни ҳар бир жабҳасидаги камчилик ва муаммоларни қамраб олиб, ҳисобот даврида партия саъйи-ҳаракати эвазига қуруқ гаплар билан эмас, аксинча таъсирчан тадбирларнинг кенг омма кайфиятига, фуқаролар манфаатларидан чиққан ҳолда мақсад ва вазифаларига қаратилганлиги намоён бўлмоқда. Ушбу жараёнда жойлардаги депутатлар корпуси фаоллик кўрсатиб, ўтган ҳисобот даврида улар томонидан доимий комиссияларга киритилган масалалар жами 428 та, сессияларга киритилган масалалар жами 233 та, мансабдор шахс ҳисоботлари жами 470 та ва депутатлик сўрови 4214 тани ташкил қилди.
Ҳисобот даврида фракция аъзолари 43 та қонун лойиҳасига ташаббускор бўлдилар. Шундан 9 таси яхлит қонунлар бўлса, 34 таси мавжуд қонунларга ўзгартиш ва қўшимчалар киритишдан иборат бўлди.
Хусусан, «Парламент назорати тўғрисида»ги, «Ўзбекистон Республикаси Давлат хавфсизлик хизмати тўғрисида»ги, «Тошкент шаҳар халқ депутатлари туман Кенгашларига сайлов тўғрисида»ги, «Фуқароларнинг репродуктив саломатлигини муҳофаза қилиш тўғрисида»ги, «Сайлов кодексини тасдиқлаш тўғрисида»ги, «Конституциявий суд тўғрисида»ги, «Қайта тикланувчи энергия манбалари тўғрисида»ги, «Яйловлар тўғрисида»ги, «Касаба уюшмалари тўғрисида»ги яхлит Қонунлар қабул қилинишга эришилди.
Қайд этилганидек, Ўзбекистон «Адолат» социал-демократик партиясининг «Адолат – ҳар бир инсон учун» номли сайловолди дастури лойиҳасини ҳар томонлама пишиқ ва пухта бўлишига катта эътибор қаратилди. Энг асосийси, дастур партия аъзолари, бошланғич партия ташкилотлари, депутатлик корпуси, фаоллар, экспертлар ва оддий фуқароларимиз фикри асосида такомилига етказилди. Янги дастурда асосий эътибор суд-ҳуқуқ, соғлиқни сақлаш, таълим ва илм-фан соҳалари ҳамда ташқи ва ички сиёсатга қаратилди.
Жумладан, «Соғлиқни сақлаш соҳасида замонавий ахборот-коммуникация технологияларини жорий этиш, «Ақлли тиббиёт» тизимини шакллантириш, жойларда аҳолига малакали тиббий ёрдам кўрсатиш, дори-дармонларнинг ноқонуний айланиши устидан партиянинг қатъий позицияни билдириш, таъсирчан қонунчилик механизмларини ишлаб чиқиш белгиланди.
Алишер Шодмонов, Соғлиқни сақлаш вазири, «Адолат» СДП Сиёсий Кенгаши аъзоси
- Бугунги кунда тиббиёт соҳасида улкан ислоҳотлар амалга оширилмоқда. Мана шу ислоҳотларда партиямизни бевосита партиямиздан сайланган депутатларнинг ҳам алоҳида ўрни бор. Чунки биринчи навбатда ислоҳотни амалга оширишда ҳуқуқий тартиб ўрнатиш, ҳужжатларни такомиллаштириш зарур. Бу борада «Фуқароларнинг репродуктив саломатлигини сақлаш тўғрисида»ги, «Она сути билан озиқлантиришни қўллаб-қувватлаш ҳамда гўдаклар ва кичик ёшдаги болалар озиқ-овқат маҳсулотларига доир талаблар тўғрисида» ги қонуни лойиҳалари бўйича ҳам бевосита бизнинг партия иш олиб борди. Айни кунларда эса «Адолат» СДП фракцияси аъзолири иштирокида «Инсон органлари, тўқималари ва (ёки) ҳужайраларини трансплантация қилиш ҳақида»ги қонун лойиҳаси устида устида иш олиб боришмоқда.
Суд-ҳуқуқ соҳасида тергов органларининг ягона тизимини яратиш, турли йўналишларга бўлинган судларни умумлаштириш, адвокатура институти мустақиллигини таъминлаш, аҳолининг ҳуқуқий маданият ва билимларни ошириш, коррупцияга қарши курашишга фуқароларни кенг жалб қилиш вазифалари режалаштирилган.
Шу билан бирга, партия аъзоларининг 25 фоизи меҳнат қилаётган таълим тизимда — умумий таълим соҳасида сифатни кескин ошириш, олий таълимда қабул квоталаридан воз кечиш, илм-фаннинг иқтисодиётда ролини кучайтириш белгиланган.
Бундан ташқари партия «пропискадан ўтиш» тизимига янгича ёндашиш, фуқароларимизнинг ўз хоҳиш-истакларидан келиб чиқиб, доимий яшаш жойини ўзи белгилаш ҳуқуқини таъминловчи қонуний базани такомиллаштириш чораларини кўрмоқда.
Дастурда оммавий ахборот воситалари вакиллари қатори блогерлик фаолиятини ҳам тегишли қонунларда ҳуқуқий асосларини шакллантириш кўзда тутилган.
Қурултойда сўз олганларнинг маъруза ва чиқишларида асосий эътибор партиянинг қонунчилик ва вакиллик органларига бўлиб ўтадиган сайловларга тайёргарлиги, барча даражадаги сайлов штаблари фаолияти самарадорлиги, электорат билан самарали ишлаш масалаларига қаратилди.
Қурултойда Ўзбекистон Республикасининг Сайлов кодексининг 70-моддасига мувофиқ Ўзбекистон Республикаси Олий Мажлиси Қонунчилик палатаси депутатлигига кўрсатилган номзодлар маъқулланди. Қурултойда, шунингдек, партиянинг олий органи ваколатига кирувчи бошқа масалалар ҳам кўриб чиқилди. Сиёсий Кенгаш ва Марказий Тафтиш комиссиясининг янги аъзолари сайланди. Партия Устави қабул қилинди. Қурултойда кўриб чиқилган масалалар юзасидан тегишли қарорлар қабул қилинди.
Қурултой ишининг якунлари бўйича маҳаллий ва хорижий оммавий ахборот воситалари ходимлари учун брифинг ўтказилди.
Реклама ҳуқуқи асосида.
Изоҳ (0)