2003-yil 28-may. Ushbu sanadan deyarli bir yil oldin Braziliya termasi va Ronaldoning qoyilmaqom soch turmagi va albatta betakror o‘yinlari sabab ko‘cha-ko‘yda to‘p tepib yurgan bolakay qalbida futbol deya atalmish “oyoqo‘yin”ga o‘zgacha mehr-muhabbat uyg‘ondi. Ammo ushbu muhabbatni alanga olishiga sabab ko‘hna Manchesterning “Orzular teatri” (keyinchalik bolakay stadion shunday atalashini bilgan, chunki u vaqtda yosh bola edi-da) — “Old Trafford”dagi bahs sabab bo‘lgandi.
2003-yil 28-may kuni Italiyaning ikki grandi — “Milan” va “Yuventus”Chempionlar Ligasi finalida to‘qnash keladi. O‘sha o‘yinga qadar futbolga oshno bo‘lgan bolakay ko‘zoynakli Edgar Davidsnigina yaxshi tanirdi. Buffon, Del Pyero, Tyuram, Shevchenko, Indzagi, Maldini, Gattuzo va Pirlo kabi o‘yinchilar haqida esa faqatgina dadasidan eshitganlarini-da bilardi, xolos. Mazkur to‘qnashuv sabab u qanotda tinim-bilmas Zambrottani, har qanday himoyachini shoshirib qo‘ya oladigan Trezegeni, sochi uzun shu bilan birga tezligi ham yuqori bo‘lgan Kamorenezini tanidi. Uncha-muncha zarbani ko‘rdim demaydigan Didani, maydonda qoyaga ayalanadigan Nestani, yugurib charchamaydigan Kaladze va mehnatkash Zeedorfni yaxshigina tanib oldi.
O‘shanda o‘yinning asosiy vaqti va qo‘shimcha bo‘limlari golsiz yakunlangandi. Aslida muxlislar o‘yinning birinchi bo‘limida gol ham guvohi bo‘lgandi. Andrey Shevchenko Indzagining uzatmasini golga aylantiradi. Biroq qanot hakamining qarori sabab gol o‘yindan tashqari holatdan so‘ng urildi deya hisoblanmaydi.
Navbat penaltilar seriyasiga yetib kelgach bolakay qalbida ham nimalardir sodir bo‘la boshladi. U bir necha daqiqa ichida quvonch va alam ko‘z yoshlari guvohiga aylandi. O‘yin davomida tinim bilmagan Trezege, Zeedorf, Kaladzelarning 11 metrlik nuqtadan adashishi va Shevchenkoning yakuniy zarbasi “Milan”ni yana Yevropa futboli taxtiga qaytardi. 11 yoshli bolakay esa 11 metrli jarima zarbalaridan so‘ng tushundi, endi uning ham sevimli klubi bor edi — “Milan”.
Hozir gap “Milan” haqida emas. Aksincha o‘sha kuni yutqazgan “Yuventus” haqida. Turinliklar Italiya futboli tarixidagi eng sovrindor klub hisoblandi. Jamoa 35 marta Italiya chempionligini, 13 marta mamlakat kubogini 8 marta esa Italiya Superkubogini qo‘lga kiritgan. Krishtianu Ronaldudek dunyo futboli yulduzini o‘z muxlislik madaniyati bilan rom qila olib, “Real”dek jamoadan ketishga majbur qila olgan klub bugun, 1-noyabr kuni o‘zining 122 yilligini nishonlamoqda. Shunday ekan, shu xotirani yodga sola olgan “Yuventus”, tug‘ilgan kuning muborak bo‘lsin! Sarri va Ronaldu bilan birgalikda Janluiji Buffonning hozirgacha ushalmagan orzusi — Chempionlar Ligasini yutish baxti nasib qilsin (boshqa klub muxlislari so‘kmaysiz, tug‘ilgan kunda har qanday tilaklar uchun ruxsat beriladi, axir)!
Yana bir bor tug‘ilgan kuning bilan, “Yuventus”!
Turin klubining mardonavor harakatlar sabab qaysidir jamoa muxlisiga aylangan bolakay esa hozir sizga ushbu yozg‘ichlarni taqdim etdi. Salomat bo‘ling!
Izoh (0)