2003 йил 28 май. Ушбу санадан деярли бир йил олдин Бразилия термаси ва Роналдонинг қойилмақом соч турмаги ва албатта бетакрор ўйинлари сабаб кўча-кўйда тўп тепиб юрган болакай қалбида футбол дея аталмиш «оёқўйин»га ўзгача меҳр-муҳаббат уйғонди. Аммо ушбу муҳаббатни аланга олишига сабаб кўҳна Манчестернинг «Орзулар театри» (кейинчалик болакай стадион шундай аталашини билган, чунки у вақтда ёш бола эди-да) — «Олд Траффорд»даги баҳс сабаб бўлганди.
2003 йил 28 май куни Италиянинг икки гранди — «Милан» ва «Ювентус»Чемпионлар Лигаси финалида тўқнаш келади. Ўша ўйинга қадар футболга ошно бўлган болакай кўзойнакли Эдгар Давидснигина яхши танирди. Буффон, Дел Пьеро, Тюрам, Шевченко, Индзаги, Мальдини, Гаттузо ва Пирло каби ўйинчилар ҳақида эса фақатгина дадасидан эшитганларини-да биларди, холос. Мазкур тўқнашув сабаб у қанотда тиним-билмас Замброттани, ҳар қандай ҳимоячини шошириб қўя оладиган Трезегени, сочи узун шу билан бирга тезлиги ҳам юқори бўлган Каморенезини таниди. Унча-мунча зарбани кўрдим демайдиган Дидани, майдонда қояга аяланадиган Нестани, югуриб чарчамайдиган Каладзе ва меҳнаткаш Зеедорфни яхшигина таниб олди.
Ўшанда ўйиннинг асосий вақти ва қўшимча бўлимлари голсиз якунланганди. Аслида мухлислар ўйиннинг биринчи бўлимида гол ҳам гувоҳи бўлганди. Андрей Шевченко Индзагининг узатмасини голга айлантиради. Бироқ қанот ҳакамининг қарори сабаб гол ўйиндан ташқари ҳолатдан сўнг урилди дея ҳисобланмайди.
Навбат пенальтилар сериясига етиб келгач болакай қалбида ҳам нималардир содир бўла бошлади. У бир неча дақиқа ичида қувонч ва алам кўз ёшлари гувоҳига айланди. Ўйин давомида тиним билмаган Трезеге, Зеедорф, Каладзеларнинг 11 метрлик нуқтадан адашиши ва Шевченконинг якуний зарбаси «Милан»ни яна Европа футболи тахтига қайтарди. 11 ёшли болакай эса 11 метрли жарима зарбаларидан сўнг тушунди, энди унинг ҳам севимли клуби бор эди — «Милан».
Ҳозир гап «Милан» ҳақида эмас. Аксинча ўша куни ютқазган «Ювентус» ҳақида. Туринликлар Италия футболи тарихидаги энг совриндор клуб ҳисобланди. Жамоа 35 марта Италия чемпионлигини, 13 марта мамлакат кубогини 8 марта эса Италия Суперкубогини қўлга киритган. Криштиану Роналдудек дунё футболи юлдузини ўз мухлислик маданияти билан ром қила олиб, «Реал»дек жамоадан кетишга мажбур қила олган клуб бугун, 1 ноябрь куни ўзининг 122 йиллигини нишонламоқда. Шундай экан, шу хотирани ёдга сола олган «Ювентус», туғилган кунинг муборак бўлсин! Сарри ва Роналду билан биргаликда Жанлуижи Буффоннинг ҳозиргача ушалмаган орзуси — Чемпионлар Лигасини ютиш бахти насиб қилсин (бошқа клуб мухлислари сўкмайсиз, туғилган кунда ҳар қандай тилаклар учун рухсат берилади, ахир)!
Яна бир бор туғилган кунинг билан, «Ювентус»!
Турин клубининг мардонавор ҳаракатлар сабаб қайсидир жамоа мухлисига айланган болакай эса ҳозир сизга ушбу ёзғичларни тақдим этди. Саломат бўлинг!
Изоҳ (0)