Ijtimoiy tarmoqlarda Toshkent shahar Mirobod tumani Mehrjon ko‘chasida joylashgan 2-sonli IIB bo‘limida 25 yoshli shaxsni ko‘rikdan o‘tkazish maqsadida Mirobod tuman tez yordam bo‘limiga kelib tushgan murojaat yuzasidan tarqalgan videoxabar Sog‘liqni saqlash vazirligi tomonidan o‘rganildi.
Vazirlik matbuot xizmatining ma’lum qilishicha, turli ijtimoiy tarmoqlarda tarqalgan videolavha shu yilning 24-oktabr kuni emas, balki 26-iyunida ro‘y bergan hamda voqea joyidagi shaxslar tomonidan tasvirga olingan. Unga ko‘ra, tuman ichki ishlar bo‘limi xodimlari xizmat vazifasi vaqtida ikki nafar ayolni mast holatda jamoat joyida janjallashib turganida qo‘lga oladi. Vaziyatni oydinlashtirish maqsadida ular bilan suhbatlashish asnosida alkagol mahsuloti iste’mol qilingani aniqlanadi. Ammo shunga qaramay fuqarolarning jismoniy va ruhiy holatini tibbiy tasdiqlash maqsadida tonggi soat 7:55 atrofida ichki ishlar xodimlari tomonidan tez yordam chaqiriladi.
Bu yerda tasvirdagi ayol tomonidan chaqiriqqa kech kelding deya, o‘sha yerdagi ichki ishlar xodimlari guvohligida shifokor E.S.ga nisbatan turli kamsitish va haqoratomuz so‘zlar aytiladi. Shunga qaramay shifokor ayolni ko‘rikdan o‘tkazadi va unda mastlik holati mavjudligini aniqlagan.Vazirlik xabarida aytilishicha, ba’zi hollarda “tez yordam”ga tushayotgan chaqiriqlarning 30-40 foizi asossizdir. Hatto u yoki bu surunkali kasalligi bor bemorlar goh qon bosimini o‘lchatish, gohida qaysidir ukolni qildirish yoki bo‘lmasa rejali davolash muolajalari uchun ham “tez yordam”ni chaqirtiradi.
“Ustiga ustak xuddi shu holat ichki ishlar xodimlari tomonidan oddiy tekshiruvlarga ham chaqirish holatlarida tez-tez uchrab turmoqda. Bu esa oddiy chaqiriqdan ko‘ra ko‘proq vaqt oladi, shifokor ham, tibbiy yordam mashinasi ham band bo‘lib qolishiga olib keladi”, — deyiladi xabarda.
Izoh (0)